Directora di Casa Cuna, Sra. Quilin Arends ta conta Bon Dia Aruba cu a meld na Polis pa motibo di precausion despues cu e muchanan a inform’e di un avion cu por a cay den awa den cercania di Palm Island.
Sra. Arends no tabata tin mucho tempo pa prensa na momento cu Bon Dia a bini cerca dje, sin embargo a confirma cu a haci un melding pa motibo di precausion na momento cu muchanan a bini cerca dje y informa cu un avion a cay den awa den cercania di Palm Island.
”E tabata un alarma falso. For di Casa Cuna, bo por mira un avion riba e parkeerplaats di Palm Island y esey ta locual e muchanan a wak, keriendo cu e avion a baha eynan.” Sr. Lito Lacle, Vocero di Cuerpo Policial ta conta Bon Dia.
Situacion confuso
Ta asina cu diabierna alrededor di 4or di atardi a drenta un melding na Centrale Post cu tin un avioneta posiblemente cu lo a cay den awa. E melding aki a bini for di Casa Cuna y mesora miembro di cuerpo policial y brandweer entre otro a bay e sitio pa asina atende cu esaki. Na prome instante a drenta informe cu a mira hasta hende cu maleta ta canando despues cu e supuesto avioneta aki mester aterisa cu emergencia. Bon Dia Aruba a comunica cu Aeropuerto cu no por a confirma nada na prome instante pero a bisa cu nada a wordo capta den señal di toren.
Testigonan cu ta biba den cercania tabata comenta cu a scucha un zonido fuerte manera si ta algo a cay den awa. A ser bisa tambe cu esaki tabata ta un avioneta cu a wordo benta den awa pa deshaci di dje. Tur esaki tabata un di e prome informenan cu a drenta haciendo e situacion aki un poco confuso pa comunidad por a compronde exactamente kico tabata andando te na momento cu Polis por a verifica y confirma tur informacion. Ora cu Bon Dia a pasa Casa Cuna, a mira persona cu maleta eynan pero nan tabata paden di Casa Cuna y por a miranan cu pañanan di baby entre otro y nan no tabata mustra manera cu nan a caba di cay cu un avioneta. Nan no tabata sushi ni cu paña muha y kisas esaki ta e personanan cu a wordo mira ta cana cu maleta, esaki no a wordo confirma pa Casa Cuna.
