E landhuis cu ta di famia Tromp situa na Chinese Garden na Fontein ta den hopi mal estado. Sinembargo tin hopi turista y tambe local cu ta bishita e luga aki diariamente.
Den e ultimo añanan e cas a deteriora rapidamente y awor por mira cu e pilarnan pafo tin sker asina grandi cu no ta falta hopi pa nan cay den otro. E tereno y e cas ta priva pero como cu e cueba di Fontein ta un atraccion turistico popular y tambe un destinacion popular bou hende local bayendo off road, hopi hende ta dal un bishita. Y mayoria atencion ta bay na e ‘gallerij’, e gang pafo.
Bon Dia Aruba a purba di haya contacto cu e doño y tambe Parke Arikok. E ultimo como cu e luga ta keda den e parke y nan tambe ta guia e turistanan na e luga aki.
Atraccion peligroso
Tin mas atraccion turistico na Aruba unda cu no ta indica di e peliger cu e turistanan por core. Comienso di e luna aki un turista a cay na e natural pool nobo na Boca Mahos. E boca aki ta conoci cu tin lama bruto y cu e barancanan por cay den otro. Manera a pasa den pasado, lagando dos piscado morto. Sinembargo cu e descubrimento di e lagun nobo, el crece den un periodo cortico den un atraccion masha popular. Esaki tambe pa motibo cu e companianan di tour a hinca e atraccion aki den nan programa.
Diariamente por mira hopi vehiculonan pasa riba e barancanan pa asina baha e turistanan via un trapi na e lagun.
Aña pasa a mustra e minister di Turismo (tempo ey Otmar Oduber) riba e peliger di e atraccion aki. El a indica cu mas y mas turista ta busca atraccion mas extremo como cu hopi turista ya a bin Aruba varios biaha caba. Sinembargo el a priminti cu lo bay pone mas borchi etc. pa avisa hendenan riba e peliger di cierto atraccion. Pero te awe nos no a mira nan ainda.
