Cas Marie: ‘Problema di demencia mundialmente ta bira pio’

Awe, riba dia internacional di Alzheimer, Lisette Does coordinador di Cas Marie ta splica tocante e malesa, cu ta un tipo di demencia y ta haci un yamada pa persona haci chekeo, mirando cu e grupo di persona cu demencia ta creciendo na Aruba.

Does ta pone enfasis cu na Aruba, ta kere cu tur hende tin Alzheimer, sinembargo esey ta djis un di variedad di tipo di demencia cu tin actualmente rond di mundo y na Aruba. Un punto importante cu Does ta comparti ta cu e grupo di persona cu demencia ta creciendo na Aruba.

No esey solamente, pero tambe cu edad di pashent ta bahando. “Esey ta un di preocupacion cu tin. Nos ta ripara cu tin caso di persona den nan 50 aña di edad cu ta cuminsa duna señal di demencia.”

Pa motibo di esaki, nan a dicidi pa duna informacion, pa asina hala atencion na famia den comunidad pa cuminsa habri nan wowo. E mensahe di fundacion Cas Marie ta pa pidi tur famia, of si sa di un famia cu tin demencia entre otro Alzheimer, pa tene pasenshi cu nan ser keri. Pa sigui duna amor y cariño, pa e trato keda mescos manera semper. “Tene e mesun norma y balor intacto y no wak nan manera hende diferente. A pesar cu nan manera di papia of idioma ta keda bay atras, haci manera bo ta compronde kico nan ta bisa. No laga nan sinti frustra.

“Si e situacion ta bira dificil, busca ayudo cerca nos na Cas Marie.” Does ta bisa cu nan tin horea pa tende cada persona nan storia y frustracion, pa asina nan por alivia nan stress y curason pa por sigui duna guia na e familiar cu tin Alzheimer, ‘esey ta mi mensahe’.

Si un persona ripara cu algo no ta bayendo bon cu nan famia, of nan mes, na mester acudi na un dokter lihe. “Sostene e poco fundacion cu ta haciendo algo pa yuda esunnan cu tin demencia. Na Aruba no tin hopi, pero cualkier yudansa financiero ta bon bini pa asina nos por keda guia y yuda tur hende.”

Does ta expresa cu nan como profesional lo sigui atende cu cada persona te cu nan por. Na Cas Marie e ta bisa cu nan ta un team chikito. E ta kere si den un futuro e grupo bira mas grandi y tin mas personal, lo por yuda mas cliente, pero ta bira dificil pa un fundacion. Tampoco no ta facil pa atende cu grupo grandi cu ta biniendo ‘ta un problema mundialmente, u demencia ta bira pio’.