Cas Ecury a bira un “KLM Blue Delft Miniature Houses”

Diabierna ultimo dia 7 di october, e aerolinea Koninklijke Luchtvaart Maatschappij N.V. (KLM) a cumpli 103 aña di existencia unda cu den celebracion aki nan a scoge un cas antiguo di Aruba como modelo di nan casnan miniatura di KLM.

E casnan miniatura a cuminsa wordo traha na aña 1952 y ta wordo regala na pasaheronan cu ta miembro di KLM ful rond mundo. E casnan miniatura di KLM semper ta replica di sea cas of edificio cu tin interes historico y arkitectura special. Durante vuelonan KLM ta reparti mas di 800 mil cas miniatura pa aña na nan miembronan y pasaheronan cu a caba di casa of tin un aniversario.

Awor e ultimo edicion cu ta e cas di mayornan di sr. Boy Ecury cu ta nos heroe nacional di segunda guera mundial tambe lo wordo reparti cu personanan rond mundo.

Den esaki, a bira conoci tambe cu esaki tabata e comienso di e celebracion di 100 aña di aviacion na Aruba cu ta bay ta otro aña y un relacion di casi 50 aña entre Aeropuerto di Aruba y KLM.

Den un celebracion special unda diferente mandatarionan, parlamentarionan, directornan y personanan envolvi den area tabata presente, KLM a organisa un celebracion, hunto cu Aruba Airport Authority, Aruba Tourism Authority y Stichting Monumenten Fonds Aruba, den centro di ciudad, dilanti un monumento cu awor lo bira cas modelo riba tur vuelo di KLM, den nan seccion di Business Class.

Joost Meijs director di Aruba Airport Authority a expresa cu “Nos lo sigui desaroya y duna forma na futuro di nos aviacion, uzando lo ultimo den tecnologia moderno. Nos lo sigui e caminda di esfuerso sostenibel, no solamente den operacion di avion di coriente entre e islanan, pero tambe den realisa henter nos operacion na aeropuerto den esun mas sostenibel den nos region, den e añanan nos dilanti.

Lo ofrece operacion di aeropuerto sigur pa e futuro generacionnan. Nos a cuminsa encamina varios trayecto di sostenibilidad, logrando diferente certificacion di sostenibilidad den industria di aviacion. Nos ambicion no ta solamente un soño, pero cu lo bira un realidad den e añanan nos dilanti”, Meijs a bisa.