Ayera nos a haya un iniciativa nobo gubernamental, cu ta algo ‘long overdue’ pero igualmente bonbini. Bou di e nomber ‘Veiligheidshuis’ (Cas di Siguridad) ta bay percura pa un coordinacion estrecho di e servicionan di husticia y otro partnernan, cu tin di haci cu comportamento aberante di hoben den comunidad. Un bon iniciativa y nos no ta bisa esey pa complace.
Nos ta tocando aki un di e dolornan mas urgente di nos comunidad, cu mester atencion. Pero tin otro motibo mas pa aplaudi e iniciativa aki, y esey ta cu esaki ta un di e cosnan cu gobernacion por haci, sin cu inmediatamente nos ta papiando miyones na gasto, cu actualmente simplemente no ta disponibel. Intercambio di informacion den sentido general dentro di gobernacion ta un punto debil pa hopi aña caba, den cierto caso pa motibo valido, ya cu e intercambio den cierto caso ta costa adaptacion di sistemanan digital, loke ta inversion considerabel.
Pero di otro banda, tin hopi caso unda por comparti informacion sin e inversionnan aki; un simpel entrega di un update di informacion cada tanto tempo lo por ta suficiente caba. Y den cierto caso un simpel reunion di consulta cada siman, bon planifica y bon structura, ya caba ta haci un mundo di diferencia. Y na momento cu e partnernan den e tipo di colaboracion aki conoce otro, cu e medionan di comunicacion moderno nan por haci bastante trabao util caba. Y e bentaha grandi di e colaboracion ta cu e ta ‘low cost’ y ta rekeri mas cu tur cos cierto tempo di trabao y algun gasto extra di recurso di trabao. Un di e elementonan mas importante den e tipo di trabao aki ta boluntad pa traha, boluntad pa comparti, y confiansa cu otro, pa por comparti informacion sensitivo, cu mester bay unda e mester bay, pero no mas leu tampoco.
Tin experiencia den pasado di cierto colaboracion basico asina den gobierno, cu tabata funciona. Sigur cu no tur cos den pasado tabata negativo y improductivo. Loke si ta negativo ta cu segun cu tempo a pasa, a bandona cierto forma di comparti y colabora, sin cu realmente tabatin un motibo pa laga esakinan bay perdi.
Awor, banda di nos optimismo pa un proyecto manera e Cas di Siguridad aki, nos ta consciente tambe cu e tereno di comparti informacion y traha hunto den cierto areanan di trabao gubernamental ta hopi mas amplio. Tin di nan cu nos ta considera structural y di interes general pa henter gobernacion. Pa cuminsa esey ta e tarea pa establece e tres database esencial pa henter gobernacion, cu ta esun di persona (Censo), esun di organisacion (Camara di Comercio) y propiedad inmobil (Vastgoedregistratie). Si tur servicio gubernamental tin acceso na tur momento na e databasenan aki, ya esey ta facilita trabao enormemente. Y nos no ta inventando nada di otro mundo; esaki basicamente ta e manera cu ta comparti informacion entre entidad gubernamental na Hulanda.
Naturalmente, den tur trabao ta necesario defini e partinan di informacion cu ta confidencial y solamente accesibel pa esunnan di e servicio particular ey cu tin autorisacion, pero esey ta cosnan cu por defini masha exacto mes den un sistema digital, y tene esaki bon warda tambe.
Un aspecto cu ta birando dia pa dia mas importante ta e forma di anda cu informacion personal di cada ciudadano, cu tin e interes di mira su datonan personal bon warda y fuera di alcance di esunnan no autorisa, garantisa na tur momento. Manera nos por a scucha o lesa den e dianan aki, tambe via reglanan internacional nos ta haya cada biaha mas aspecto pa cumpli cu nan, manera e recien aproba ley Europeo di dato personal. Y nos no mester haci e cosnan aki solamente pasobra di pafo ta impone nan riba nos; mester haci’e pasobra e ta lo corecto pa haci.
Y pa bolbe na e tema cu cual nos a cuminsa, ta netamente aki nos mester ta consciente di e dos aspectonan aki: colabora y comparti informacion, y na mes momento percura pa e debido proteccion di e datonan personal di e individuo y famianan cu cual ta traha.
Pero, nos no ta termina sin toca otro tema importante den e trabao aki di haya mas grip riba nos situacion social y e gruponan di mayor riesgo, y esey ta e informacion na comunidad. Demasiado biaha ainda ta resulta cu den gobernacion ta reina un ambiente di secrecia, hasta den asunto unda por duna informacion na publico sin ningun problema. Y no mester ta asina cu e servicionan gubernamental ta duna informacion cu ta duna na e ciudadano como un fabor, cu por elimina tambe si e ciudadano uza e informacion pa formula critica.
Si nos ta mira e bentahanan di un comunidad mas critico, anto nos por anticipa cu ora e haya informacion, e ta bolbe pa puntra mas o pa duna critica. Motibo pa rabia y dal porta cera atrobe? Nos ta kere cu aki tambe henter gobernacion mester profesionalisa y siña anda cu un comunidad miho informa, cu no ta guli tur cos sin mas. Critica ta fomenta cambio, y cambio por trece mehoracion.
