Sr. Paul Schouten, director y propietario di Cas di Max, a anuncia ayera cu Cas di Max ta cambia nan showroom situa na Meiveld y lo muda esaki pa e showroom cu t’ey caba na Schtolandstraat.
“Nos a haya oportunidad pa huur full e edificio na Schotlandstraat, aworaki tur cos cu tabatin den e showroom na Meiveld por fit bao di un solo dak”, Schouten a indica.
El a splica cu e idea pa muda e showroom di Meiveld ta pa tur cliente por bin un solo caminda en bes di bay wak cama so na Schotlandstraat y bay wak cashi y otro mueble na Meiveld.
“Hendenan tabata core riba bao y tin biaha por bira fastioso cu tempo y gasolin, dus nos a dicidi, y nos a haya suerte cu nos por a huur full edificio na Schotlandstraat, y pone tur cos bao un dak”, el a remarca.
Tur cliente por yega na Schotlandstraat pa wak tur loke Cas di Max ta ofrece y si nan ta desea di cumpra algo pa bay cune, nan por cumpr’e e ora nan ta bay na e edificio situa na Meiveld cu lo bira aworaki un warehouse. El a indica cu Meiveld lo keda habri unicamente como warehouse y pa pick up.
Cas di Max tin otro warehouse situa na Dakota, y eynan tambe tin cierto mueblenan. Ora cu un cliente haci nan compra na Schotlandstraat nan lowordo informa na cua warehouse e cliente mester bay pick up su mueble.
“90% di biaha nos ta deliver, pero si un cliente echt no por warda e por bay busk’e na un di e warehouse y nos trahadonan lo yuda nan subi nan mueble den nan auto pa asina e cliente por bay cune di biaha”, Schouten a agrega.
Por ultimo Schouten a enfatiza un biaha mas cu e showroom na Meiveld lo cera pa publico ya cu esey lo bira un warehouse solamente. A cuminsa muda e showroom caba y clientenan por pasa wak desde awe caba loke Cas di Max ta ofrece, pero oficialmente e showroom lo keda completamente cla entrante dialuna 12 di december.
