A pesar di e situacion di e pandemia di Covid 19 andando y cu tur e medidanan cu no ta permiti aglomeracion di hende, Hubentud Uni Seroe Preto a dicidi di toch cende e luznan di Sero Preto na San Nicolas den celebracion di nan 35 aniversario como Fundacion.
Inoficial nan ta existi ya pa 50 aña cu a cuminsa como “Flying High Park”, despues “Cas di Luz” y no kier a laga e bario pasa fin di aña sin haci algo pa e temporada. E aña aki lo usa e decoracion di e aña anterior mes, y ta bay den estilo di “Drive Thru”. No tin bendemento di cuminda ni bebida pa recauda fondo ni por yega cerca, ya cu e lugar lo ta cera cu un tipo di cura pa cortesia di Bohama NV. Autonan por pasa wak so, no ta permiti aglomeracion di hende ningun caminda ey banda. Lo tin control di Polis pa tur cos bay organisa. Esaki Sra. Selma Helder, vice presente y secretaris di Hubentud Uni Seroe Preto a anuncia awe.
Dia 12 di december 2020 ta cende e luznan di Cas di Luz Seroe Preto 7pm te cu 10 pm y asina tur anochi te cu dia 6 di januari 2021. Ta pidi un y tur pa mantene reglanan vigente di DVG y pasa unicamente den auto so disfruta di e luznan y a pesar di tur cos sinti alegria di fin di aña.
Selma Helder a gradici tur hende cu a yuda y specialmente e sponsornan Aruba Bank, SETAR y Bohama.
Danki pa semper a sostene e proyecto pa pueblo di Aruba aki cu den e temporada di fin di aña cu e Cas di luznan di Seroe Preto a bira un atraccion bunita.
