Cas di Cultura: consecuencia di situacion financiero

Den e dianan cu a pasa nos por a tende cantidad di opinion tocante e edificio cu pa varios decada tabata e luga di encuentro pa evento cultural. Hopi di nos tin recuerdo cu ta algo pa henter nos bida. Tur pueblo culto tin un of mas luga asina unda pueblo ta bin hunto pa celebra momentonan di placer y di siña. Y, segun e prosperidad cu ta toca e pais en cuestion, ta percura pa mantene un luga sagrado asina den bon condicion. Realmente no ta necesario ni discuti un tema asina; e ta un di e cosnan cu nos por considera, wel… normal!

No na Aruba! Y no pasobra no tabatin un maneho cultural. Bon of malo, tabatin un cierto maneho cu tabata mas bien dirigi riba, por ehemplo, e expresion di herencia cultural no tangible, loke naturalmente ta bon. Pero conserva y stimula cultura ta implica tambe cu bo mester di luga pa tene evento cultural. Y tampoco ta asina cu e recursonan pa mantene e infrastructura necesario lo mester di e ministerio cu ta maneha cultura, pero di algun caminda den presupuesto e lo mester bin. Conclusion ta cu e problema no a bin dilanti te awor y cu no tin nada presupuesta awor pa alivia e situacion inmediatamente.

Y, tene na cuenta cu e situacion actual na Cas di Cultura ta djis un parti chikito di e problema, crea pa falta di recurso pa haci e cosnan ‘normal’ cu cualkier gobernacion, di cualkier color, mester haci o resolve. Algun ehemplo. Cualkier persona cu mester atende un asunto cu polis, mester haya henter un splicacion prome unda tal o cual departamento di polis ta situa. Y pakico? Pasobra simplemente no ta duna prioridad  na resolve e problema di luga adecua pa funciona. No ta awor a yega na conclusion cu e oficina central na Wilhelminastraat ta na un luga inapropia mirando e desaroyo urbano cu a tuma luga na Aruba y cu ta haci cu polis mester un miho base di operacion. Memey di monton di plan bunita pa haci yen di cos ‘fancy’ cu acomodacion pa servicionan di gobernacion den e districtonan, nos tin ainda un ex-JFK na Camacuri den ruina, igualmente e edificio anterior di DOW.  Mientras cu polis ta plama entre varios oficina, obstaculisando asina un trabao eficiente. No por a drecha sikiera un di e dos edificionan aki cu tambe ta pertenece na nos herencia cultural, siendo parti di e arte di construccion den e prome parti di siglo pasa?

Ora nos yega na e conclusion cu no tin placa pa haci algo na e problema aki (di Cas di Cultura), nos ta yega na e pregunta ta pakico no tin placa pa haci algo? E contesta ta simpel: den e cosnan aki ta bira visibel kico ta significa ora bo tin un pais cu ta te su nek den debe y ta cay desde algun tempo bao di supervision financiero di Reino! Hopi biaha, ora bo purba splica un persona kico ta un ‘megadebe’ (di 4000 miyon florin plus 1000 miyon di PPP), bo ta haya bo cu e problema cu cifra riba nan mes no ta bisa tanto. Pa hopi hende, tanten e problema no bira algo cu nan ta sinti ‘en carne propia’ o en todo caso bira visibel pasobra ta algo cu ta toca nan personalmente, e no ta bisa nan mucho.

Ta dificil pa hopi di nos ciudadanonan pa visualisa cu pa e proximo 20 aña of mas e placa pa cualkier gobierno cu sinta, lo ta limita. Y e cosnan cu ta keda sin haci, ta e cosnan ‘normal’ cu bo mester por spera di cualkier gobierno. Buraco den caminda, por ehemplo. Algo cu ta afecta nos tur cu mester transita nos camindanan pa yega unda nos mester yega. No ta ultimamente cu awa ta yobe hopi, diripiente e mal estado di caminda a bira un problema. E ta un problema pasobra tin asina hopi trabao di mantenemento atrasa, cu awor cu awa ta cay, e asfalt cu a habri aña pasa, awe a bira un buraco grandi. Djis pa menciona un par di ehemplo: ta ultimo lunanan e caminda principal di Noord, di luz di trafico te Saliña Cerca, ta un desastre? Ta awe e caminda di Sabana Basora ta un desastre? Ta ultimamente e  ‘patchwork’ dilanti e hotelnan a bira un problema?

E realidad ta cu gobierno, ora caba di paga salario, interes riba debe, y un minimo di bienes y servicio cu mester, no tin placa pa nada. Hasta silenciosamente a corta rigurosamente den e recursonan pa asistencia social riba diferente tereno, y a pasa responsabilidad pa AZV pa nos como ciudadano paga den forma di aumento – bao di otro nomber (BAZV) – di BBO.  Y e situacion aki ta bay, o mester, marca paso den e campaña electoral e aña aki. No tin pakico kere storia bunita, plan fantastico, pasobra cu 5000 miyon di debe y un GDP di menos di 5000 miyon, nos mester ta contento cu un gobierno cu ta duna prioridad na e cosnan ‘normal’.