Siman pasa, Vicky Arens, directora di Cas di Cultura a para banda di Mezzo Soprano y fundador di Nos Teater Korsou Sra. Tania Kross (Corsou) y directora di Terramar Museum y presidente di Aliansa Kultural Boneiro, Sra. Jude Finies (Boneiro), pa hunto lansa e fundacion di Aliansa Kultural Korsou (AKK).
Esaki sigur tabata un momento di historia pa e sectornan di cultura di Aruba, Boneiro y Corsou. AKK ta un Aliansa cu ta uni artista y instancianan cultural cu e meta pa fortalece y profesionalisa e sector di Arte, Cultura y Media.
AKK ta dedica na busca fondo, desaroya programa cultural y organisa evento cu ta pone talento di hobennan den splendor. Hunto cu Cas di Cultura Aruba, representando su stakeholders tambe, y Aliansa Kultural Boneiru, ta uni forsa pa promove intercambio cultural y cooperacion den nos islanan y na Hulanda. Den e compilacion di Aliansa Kultural islanan ABC ta bay – sobrepasa obstaculonan constitucional y burocratico – y lo enfoca riba fortalece e herencia cultural cu ta di importancia pa Reino Hulandes.
E iniciativa nobo aki, Aliansa Kultural ABC ta lanta pa artistanan, personanan creativo y organisacionnan cultural di e sector mes cu hunto por stimula un economia cultural tambe. “Aliansa Kultural Boneiru a keda lanta na 2023 pa 10 organisacion local y a aplica y ricibi un “start kapitaal” di 25 mil Euro, otorga pa ministerio di BZK como meta pa profesionalisa y hiba combersacionnan den comunidad tocante conscientisacion di e trayectoria di Pasado di Sclavitud.
Durante 2024 e organisacionnan a reuni structuralmente pa formacion di e organisacion y a ripara cu pa logra metanan fundamental y structural mester traha hunto cu islanan ruman tambe, paso nos ta comparti nos herencia y experticionan den Reino, y trahando hunto nos ta mas fuerte pa comparti e reto di cada isla cu alabes ta garantisa exito colectivo. Cu e prome combersacion cu Tania Kross, presidente di Nos Teater Korsou, a bira claro cu nos tin cu uni. Tania a envolvi Vicky Arens directora di Cas di Cultura di Aruba cu na otro banda for di 2022 a acerca Tania pa traha hunto. Nos no ta kere den casualidad pero nos ta kere cu awor mas cu nunca intercambio cultural y de conocemento ta di importancia pa Reino completo, y a keda pa hopi tempo innecesariamente desatendi,” segun Jude Finies di Aliansa Kultural Boneiru.
Inversion publico den infrastructura cultural, por ehempel pa un Cas di Cultura na Aruba por perdura, actualmente ta e unico teatro riba nos islanan, y pa herencia cultural, pa investigacion
independiente y inversion den periodismo investigativo y confiabel, ta asina importante como formacion di ciudadania y fortalecemento di nos sector social. Esakinan ta fundamento indisputabel pa ciudadanonan keda bon informa, y bira asertivo, y ta un di e fundeshi mas importante pa un estado di derecho democratico.
Fundacion Across The Isles Boneiro lo representa e Aliansa ABC, pa como islanan uni, sinta na mesa cu Den Haag y dialoga tocante BIS (Basis Infrastructuur), Rijksfonden, Meerjaren regelingen etc. pa haya e trato igual den reino y fondonan cu nos islanan merece. Pa por keda desaroyo pa medio di arte y cultura, pa madura como paisnan pa nos ciudadanonan para mas fuerte den nan sapato.
