Cas Blanco: Venezuela ta e preocupacion mayor di Merca den America Latino

‘Golpazo’ di economia y crisis politico na Venezuela ta e preocupacion mas grandi di Merca den Latino America, asesor di seguridad di Cas Blanco a bisa ora cu el a ser yama pa Donald Trump pa evita confrontacion di banda di Merca.

“Loke mas ta preocupa nos ta Venezuela, e golpazo di nan economia, necesidad di dialogo y avance” entre gobierno di Nicolas Maduro y grupo di oposicion, Ben Rhodes, asesor di seguridad nacional a bisa.

“E situacion na Venezuela ta un desafio pa e gobierno di Trump, cu ta yega na Cas Blanco dia 20 di januari proximo. Washington mester tin un papel constructivo den e relacion aki”, Rhodes a bisa.

Merca ta un di e paisnan cu miho posicion pa hunga un papel constructivo hunto cu Venezuela, pero ta posibel solamente si Maduro no ta insisti den un modelo di confrontacion cu gobierno di Chavez y Maduro a aplica te awor.

Durante e tempo di campaña di Trump el a dedica un momento den su discurso pa Venezuela, ora cu el a bisa cu si e no resulta eligi presidente, anto corte supremo por transforma Merca di un manera nunca visto, manera e pais Sudamericana a haci den epoca pasa.

Venezuela ta den un crisis economico grave pa motibo di prijs abao di petroleo, cu consecuencia di poco placa disponibel, despues cu inflacion a keda calcula na 475.8% na 2016, segun IMF. Pa e motibo aki den parlamento grupo di oposicion na Venezuela a habri un proceso di destitucion contra Maduro, pasobra nan ta kere cu e ta responsabel pa e crisis.

Prome cu Trump a resulta ganado di presidencia di Merca dia 8 di november cu a pasa, Maduro a bisa cu e no tabata spera nada di Trump of Hillary Clinton, pasobra ningun di nan tabatin bon sentimento o interes pa Venezuela, ni pa America Latino.

Pero despues di e eleccion Maduro a boga pa busca un “posibel agenda di trabao habri” cu Trump.