Mientras Carubbian Festival ta cla pa inicia cu temporada nobo 26 di mei proximo, Nico Connor a presenta na Minister Oduber produccion “Just Ponging”. “Just Ponging” ta consisti di un DVD unda pa prome biaha Nico Conner ta canta invitando e turistanan bin experencia Carubbian Festival y un CD cu cancionnan inspira pa e festival na San Nicolas.
Recientemente tabata tin un reunion cu directiva di Carubbian y den Parlamento presupuesto di TPEF pa aña 2016 a keda aproba. E fondo di TPEF ta esun cu ta subsidia e festival y awor cu e aprobacion den parlamento di Aruba por menciona cu tin fondonan disponibel pa continua cu e festival manera tur hende tabata den espera di dje. Ya a pone fecha pa inicia cu e temporada nobo di Carubbian Festival cu lo ta dia 26 di mei proximo.
Minister Oduber a comenta cu e festival lo inicia cu extra atencion riba e calidad halto cu kier pa esaki tin. Carubbian mientrastanto ta bay cumpli 5 aña y a pasa den man di 3 diferente hunta di supervision, unda cada un a contribui y haci nan trabou debidamente. E bunita di e aña y temporada nobo aki ta cu pa prome biaha a percura pa tur e gastonan cu a haci como inversion di entre otro mascarada, stoel, mesa y tentnan di Carubbian Festival, cu tabata un peso financiero pa e directiva, e aña aki e hunta di supervision a logra pa elimina esaki completo unda cu 26 di mei 2016 ta cuminsa cu un presupuesto positivo den e bukinan financiero. Carubbian Festival ta cuminsa awor den un estado financiero positivo, caminda cu a elimina practicamente tur e debenan cu e diferente proveedornan desde 5 aña pasa cu nan a cuminsa. Henter comunidad ta keda cordialmente invita pa forma parti di e apertura di e temporada nobo di Carubbian diahuebs, 26 di mei proximo.
Fuente informacion comunicado di gobierno
