Encuanto un investigacion riguroso cu ta tumando luga relaciona cu un eventual caso di malversacion riba e cuentanan di e comision responsabel pa organisa Carubbian Festival, Bon Dia Aruba a papia cu directora di ATA, Ronella Tjin Asjoe-Croes, ya cu ATA ta un di e sponsornan principal di e festival aki.
Tocante e caso aki, sra. Tjin Asjoe-Croes ta haya importante di bisa cu di nan banda nan tin un acuerdo stricto cu Carubbean Festival a base riguroso. “Nos como un di sponsornan nos ta haci evaluacionnan tur aña.”
Directora di ATA a laga sa cu nan no ta envolvi den e maneho diario di Carubbian Festival, sino cu nan ta opera cu ATA manera cualkier otro entidad cu ta ofrece servicio of un producto pa ATA. Nan mester cumpli cu e rapportnan relaciona cu nan actividad, entre nan e rapport financiero. E ta indica cu Carubbian Festival a cumpli cu nan rapport financiero di 2015 pa asina nan por a drenta pa un acuerdo di 2016 cu ATA. Tur acuerdo tin e mesun stipulacion.
E cifranan cu nan ta presenta a base di nan rapport mester wordo audit pa un compania di auditorio independiente. “Esaki ta un di e cosnan cu nos ta exigi como ATA.” Nos por a compronde cu e audit aki di Carubbian Festival su rapport financiero ta conta cu e auditorio di un firma di accounting independiente. Bon Dia Aruba ainda no a haya acceso na e nomber di e compania di e accounting cu a audit Carubbian Festival.
Tampoco nos a logra di drenta den contacto cu e organisacion mes di e festival. Bon Dia Aruba lo purba di haya mas informacion pa sigui riba e topico aki. E festival ta un evento semanal pa atrae turistanan pa San Nicolas.
