(TMZ) – Artista Mexicano Peso Pluma lo tin un concierto na Tijuana, y un cartel Mexicano no ta contento cu esaki. Nan ta asina encontra di e concierto aki cu nan a duna e cantante menasa rond di henter e ciudad y na un manera hopi directo.
Un di nan ta un poster cu a ser mira colga riba un brug diamars mainta cu a bisa “esaki ta bay na Peso Pluma, no presenta bo mes dia 14 di october, paso e lo ta bo ultimo show a causa di bo falta di respet y lenga los.” E ultimo frace di e poster ta dificil pa lesa, pero aparentemente ta bisa “si bo bini nos ta bay kibra bo.” Esaki por ser traduci den varios manera, pero tur traduccion ta duna di compronde cu ta trata di daño fisico.
E menasa aki a keda firma pa Nueva Generacion del Cartel de Jalisco, cual ta un sindicato di crimen basa na Jalisco, Mexico unda e cantante di 24 aña a nace. E grupo aki ta lidera pa “El Mencho”, un di e lidernan di droga mas busca mundialmente.
Ademas, e menasa aki a bini prome cu Peso Pluma a subi escenario diamars anochi na MTV Video Music Awards cu a tuma luga na New Jersey.
Te ainda Peso Pluma no a responde na e menasanan aki, sinembargo a pospone caba un gran cantidad di conciertonan binidero. Lo mas impresionante ta cu e concierto cu ta den plan pa Tijuana te ainda ta permanece den su schedule y su proximo show ta den plan pa tuma luga na Nevada pa fin di september.
Te ainda no a keda cla si e shownan cu a keda posponi ta a causa di e menasanan cu e cantante ta ricibiendo di parti di e cartel of causanan separa.
