(EFE) – Den un rapport di Organisacion di Nacionnan Uni (ONU) tocante cocaina ta indica cu un parti importante di violencia na Latino America ta relaciona cu narcotrafico debi na rivalidad entre aliadonan local di cartelnan Mexicano di Sinaloa y Jalisco Nueva Generacion.
Un di e puntonan central di e rapport Mundial tocante Cocaina 2023 ta e analisis di fragmentacion di ecosistema criminal di narcotrafico, aunke ta indica cu na Mexico ta sigui existiendo organisacionnan cu hopi poder.
“E panorama criminal Mexicano cada biaha ta mas compleho y fragmenta. Na e momentonan aki, autoridadnan Mexicano a identifica nuebe grupo delictivo organisa grandi cu ta inclui aproximadamente un total di 53 grupo,” e rapport ta indica.
“Cartel di Sinaloa por ehemplo, por describi su mes como un ‘red di aliansa’ di varios celula specialisa, cada un cu un funcion specifico den e cadena di suministro,” e rapport ta señala.
Cartel di Sinaloa y Jalisco Nueva Generacion ta e dos cu tin mas presencia internacional, expertonan di ONU ta sigura. Ademas ambos tin un presencia grandi na mercado di Merca.
“Segun algun analista, aumento di violencia den relacion cu narcotrafico na Sur America y Centro America a haya impulso principalmente di competencia entre representantenan local di e dos grupo aki,” ta indica.
Como casi ni un otro grupo criminal ta controla tur e cadena di suministro di cocaina for di Sur America te mercadonan di destino, como Europa y Nort America, nan ta crea aliansa na diferente fasenan di e proceso.
“E colaboracionnan aki ta hopi dinamico y instabil, por ehemplo, den caso di Mexico, na unda aliadonan criminal di ayera por bira enemigo di awe y viceversa,” ONU ta adverti.
Ta p’esey cu competencia pa control di espacio of di punto di distribucion por caba cu actonan di violencia.
Tambe e rapport ta indica cu un serie di acto violento na Ecuador a wordo vincula cu rivalidad entre e gruponan criminal local vincula cu cartel di Sinaloa y di Jalisco Nueva Generacion.
Trafico di cocaina ta solamente un parti di e negoshi criminal di e gruponan delictivo Mexicano, ya cu nan ta implica den otro actividadnan, como trafico di marihuana, heroina, stimulante, armamento y personanan.
