Despues di casi varios dia di reunionnan y encuentronan cu delegadonan di diferente pais di mundo cu a bin Aruba pa atende e Specially Protected Areas and Wildlife (SPAW), protocol di Land-Based Sources Protocol (LBS) y Cartagena Convention (COP17) ayera finalmente esaki a culmina cu e firmamento di dos MoU entre Aruba, Corsou y Hulanda.
Minister encarga cu Medio Ambiente, Ursell Arends a splica cu a yega na palabracionnan concreto cu e firmamento di dos Memorandum of Understanding (MoU) cu a ser formalisa cu Reino Hulandes caminda cu Aruba, Hulanda ,Corsou y proximamente Sint Marteen a compromete nan mes pa e conservacion di naturalesa, siguridad di alimentacion, entre otro, pa asina nan por cumpli cu tratadonan internacional y haya colaboracion den Reino pa cada pais aki por cumpli.
Den un otro MoU cu a firma, Arends a menciona cu nan tin cu bay traha riba ‘gobernance’ pa loke ta trata oceannan cu ta rond di e paisnan aki y e prome pais cu a firma esaki ta Aruba conhuntamente cu Corsou y Hulanda pa asina ey manera minister a sigura, ta pa mustra e compromiso cu nan tin como Reino pa atende cu temanan di bida marino, naturalesa y den tur e reunion aki Aruba tin e presidencia pa e proximo 3 aña pa atende cu e parti di United Nations Environment Programme (UNEP) unda minister Arends lo tin cu encabesa e reunionnan aki pa hunto cu otro pais den reino por yega na solucionnan concreto.
Den reunionnan aki e lidernan di medio ambiente di full e region a bin dilanti cu companianan tambe ta tuma accionnan negativo contra medio ambiente y esey pa hopi biaha no ta bin dilanti, “esey tambe ta cosnan cu nos a discuti, cu ta necesario pa tin datonan concreto pero tambe ta necesario pa tin stakeholders comprometi cu e parti di ciudadanonan pero den corporacionnan tambe, cu mester wordo scucha pa nan tambe tin informacionnan cu nan accionnan por tin consecuencianan negativo pa medio ambiente y esey ta cosnan cu nos a discuti y nos a palabra cu nan ta bay informa e ciudadanonan pa nan ta al tanto di kico ta e cambionan cu ta bini y tambe e companianan, pa nan sa kico ta e cambionan cu nos kier mira pa hunto cu nan nos por cambia y atende cu naturalesa.” Minister Arends a sigura.
E ta sinti cu na Aruba, ya caba nan ta tumando pasonan pa involucra e ciudadanonan y por ehemplo den e parti di bida marino, nan ta involucra piscadonan pa decisionnan cu nan ta tuma y di e forma aki involucra otro stakeholders den decisionnan cu mester tuma.
“E reunionnan aki ta brinda oportunidad unico pasobra nos tambe ta scucha di e best practices di otro islanan cu a resulta y mi ta kere cu a nos tambe por haci uso di esaki y implementa nan na Aruba pa nos por mira resultadonan positivo cu nos kier wak ora ta trata nos naturalesa,” el a bisa.
Algun lidernan di organisacionnan ambientalista di Aruba tambe tabata presente den e reunionnan aki, entre nan Rainbow Warriors Aruba ken a entrega un intervencion cu a ser considera pa con por usa tecnologia pa crea miho datonan pa por tuma decisionnan basa riba datonan concreto.
Minister Arends a informa cu ta bay tin un proximo reunion di Cartagena Convention cu ta bay tuma luga di manera online unda eynan lo concretisa tur esaki y “varios di NGO’s di Aruba a participa di un manera activo den reunion aki unda nan a trece nan puntonan dilanti “mi ta kere cu hopi di nan nunca a participa den un COP mes y door cu Aruba tabata e anfitrion e biaha aki, a brinda un oportunidad unico na nos NGO’s tambe pa no solamente presencia e reunion sino tambe pa contribui positivamente den e cambionan cu tambe kier mira, esey ta loke nos kier mira pa nos NGO’s ta mas activo pa no solamente wak e cambionan cu nan kier sino cu esey tambe por yega na otro islanan.”
“Nos ta demostrando como e tres pais cu ta tuma accionnan concreto pa naturalesa”
Prome minister di Corsou Gilmar “Pik” Pisas tambe tabata presente den e reunionnan aki no como prome minister, manera el a sigura sino como minister di Naturalesa y Medio Ambiente na unda el a splica cu for di diamars tabatin diferente sesion y cu e ta hopi contento cu e resultado di esaki pa motibo cu “durante e sesionnan ma trece dilanti cu mi a bay hopi convencion y na final mi kier resultado, awe mi a mira concretamente cu nos ta canando den bon caminda den sentido cu tur e paisnan cu a bin aki a compromete nan mes pa tin un siguimento di lo cual cu a pasa awe y pa mi e ta masha importante, pasobra na dado momento nos tin cu proteha nos naturalesa,” Pisas a sigura.
Tambe den parti aki el a señala cu nan ta papiando specificamente di lama unda “nos tin cu tuma accionnan concreto pasobra bo mes ta mira cuanto cos ta pasando, wak e calor inmenso cu tin rond di mundo y tur esaki ta bin debi na nos naturalesa, cu e acuerdo aki cu nos a firma cu Hulanda y cu Aruba nos ta demostrando como e tres pais cu ta tuma accionnan concreto pa cu esaki.” Pisas a bisa.
Den accionnan aki, mester zorg pa tin e finanzas pa motibo cu por tin hopi plan pero mester tin e fondonan pa ehecuta e plannan ey, aworaki e organisacionnan internacional a compromete nan mes cu nan ta bay busca e aspecto financiero caminda nos tin cu pone tur lo cual loke nos tin cu implementa in place “pa e ora ey mundo por mira cu nos Corsou, Aruba y Hulanda ta un ehemplo, y pa e otro paisnan tambe nan lo asocia nan mes nan e MoU cu nos a firma unda tin plannan con nos ta bay atende cu e bida bou di lama y tambe proteccion di tur lo cual ta sucede rond di lama pasobra tambe tin sushedad riba tera y esaki ta bay trece cune e accionnan aki.
