Un grupo di shete compania ta construyendo un set di cinco edificio di mas di 30 piso cerca di e afamado Castillo de San Felipe de Barajas, na Cartagena de Indias, ciudad Colombiano cu ta conta cu un di e centronan urbano antiguo mas conoci di henter continente y cu ta reconoci como patrimonio di Humanidad.
Lucas Tamayo Giraldo, representante legal di Promotora Calle 47 S.A.S., e consorcio di empresa menciona, ta sigura cu prome cu nan a cuminsa cu e proyecto polemico aki, cu ta un menasa pa patrimonio di e ciudad, e grupo a consulta cu Instituto di Patrimonio y Cultura di Cartagena (Ipcc) y cu Corvivienda, entidad cu a duna visto bueno na e proyecto, como vivienda di interes social.
“A solicita certificacion di Corvivienda como proyecto di vivienda di interes social, dia 6 di april 2015, obteniendo resultado positivo segun resolucion 0706 di 28 di april 2015. A haci solicitud pa ahusta e unidadnan certifica como vivienda di interes social (VIS) cerca Corvivienda, registra dia 4 di november 2016 y aproba segun resolucion number 082 – 2017 di 27 di februari 2017,” Tamayo Giraldo ta splica den un comunicado di prensa den cual e ta sigura cu e proyecto di 5 toren ya ta totalmente comercialisa.
Cerca Ipcc, e grupo constructor a puntra, dia 14 di april 2015, si e proyecto ta o no ta den e area di influencia di e Castillo di San Felipe, y a ricibi como respuesta cu e tereno no tabata den e area di influencia di e fortificacion emblematico. A tramita e prome permisonan cu gobierno di Dionisio Vélez Trujillo, alcalde di Cartagena, na 2015. Finalmente, pa e di cinco edificio a registra solicitud na maart 2017 y na juli 2017 a haya e licencia.
E proyecto Acuarela ta un proyecto multifamiliar di vivienda di interes social (VIS) planea den cinco etapa, y ta consisti di cinco edificio di apartamento, cu apartamento cu ta varia entre 43 y 56 metro cuadra y un area di staciona comun. E balor maximo di benta ta esun permiti pa ley pa e tipo di proyecto aki, cu ta di 135 salario minimo mensual vigente na momento di registra e cumpradonan. Esaki segun declaracion di un representante di e firma constructor.
Un buraco den ley, causa pa no actualisa e Plan di Maneho y Proteccion di e Centro Historico di Cartagena durante 25 aña y e Plan di Ordenamiento Territorial cu no ta actualisa desde 2001, a faborece construccionnan ilegal y obranan cu ta afecta e patrimonio, manera ta e caso di e torennan di Acuarela.
Di parti di Ministerio di Cultura e responsabilidad ta cay riba e division di patrimonio, responsabel pa proteccion di e fortificacionnan y henter e patrimonio cultural di e ciudad. Cu solamente dos toren bao construccion y no ainda na e altura proyecta, ya e construccion ta visibel desde varios punto di e Castillo y e ciudad antiguo.
