E gremionan empresarial Aruba Trade & Industry Association (ATIA), Aruba Hotel & Tourism Association (AHATA) y Camara di Comercio y Industria (KvK) a dirigi un carta di urgencia fecha 27 di augustus na Promer Ministro Evelyn Wever-Croes, pa expresa nan preocupacion si no ta yega pronto na un acuerdo cu Hulanda, pa por haya e prestamonan cu ta necesario.
Den e carta ta referi entre otro na e posicion financiero di Aruba, unda e gremionan ta señala cu pa 2020 lo mester por lo menos Afl. 682,4 miyon y pa 2021 por lo menos Afl 579 miyon pa cubri e deficitnan anticipa. Sin Afl. 1,26 biyon gobierno di Aruba lo no por paga su empleadonan ni financia su programanan den e proximo aña y mey, incluyendo SVb y AZV.
Tambe ta observa cu ta actividad comercial ta genera fondo pa presupuesto di gobierno y sin recuperacion significante for di e crisis di Covid, gobierno lo keda cu entrada insuficiente. Riba esey e gremionan ta di opinion cu lo no tin recuperacion economico significante promer cu 2023, y cu economia local ta ser teni a flote artificialmente cu subsidio na empresa mediano y chikito y subsidio di salario, adicional na ayudo di banco, compania di seguro y fondonan di pension, cu lo termina.
Tambe e gremionan ta referi na expresion di parti di gobierno mes, cu e unico fuente creible di financiamento na e momento aki ta Hulanda, cu ta duna prestamo cu no por haya riba mercado internacional o local. Manera tur otro fiador na mundo, Hulanda tambe a pone su condicionnan pa e prestamonan, e gremionan ta observa. E proposito di e condicionnan di Hulanda ta pa establece un mihor structura di gobernacion pa despues Aruba ta den un mihor posicion pa resisti un crisis financiero. Esaki lo facilita Aruba tambe pa por paga e debenan back segun e condicionnan di esakinan. Pa garantisa e restructuracion y reforma necesario lo tin supervision pro activo y incentivo di Hulanda durante e transicion, cu lo dura aproximadamente 6 aña pa por transforma Aruba su sistemanan financiero, hudicial y educativo y establece un economia mas robusto y resiliente. Na final di e periodo aki Aruba lo tin su autonomia fortifica y lo ta den un mihor posicion cu promer cu e crisis di Covid, e gremionan ta argumenta.
Tambe nan ta observa cu durante e transicion gobierno di Aruba lo tin ‘input’ y lo ta mayormente den control di e implementacion. Como comparacion e gremionan ta referi na e ehemplo di e ayudo cu Hulanda a haya di Merca entre 1948 y 1951 (US$1,1 biyon) cu un voz den uso di e fondonan aki pa e Mericanonan den planificacion mas amplio di recuperacion Hulandes, cual ta conoci como Marshall Plan.
Sin embargo, e gremionan ta observa cu tin cierto resistencia politico contra e opcion aki, segun nan opinion pasobra parlamento di Aruba ta mira e entidad nobo como un menasa pa e papel supervisor di parlamento, di cual e gremionan ta observa cu su efectividad (di parlamento di Aruba)tambe “ta suheto na cuestionamento”. Aruba tin segun e gremionan solamente dos opcion:
1. Negocia e mihor acuerdo posible y acepta e condicionnan cu un transicion pa un fundeshi mas fuerte, cu supervision y asistencia di Reino.
2. Nenga e prestamo y permiti nos economia pa sigui lidia, perdiendo e capacidad di por paga empleado publico y di financia otro programanan manera cuido di salud. Esaki segun e gremionan lo resulta den default di Aruba riba su prestamonan local y internacional. Bancarota y desempleo lo crece exponencialmente y comunidad lo experimenta mas sufrimento promer cu Reino lo mester tuma over gobernacion (manera stipula pa Constitucion y Statuut, articulo 43). Unavez cu Hulanda take over, lo no tin participacion di gobierno ni parlamento di Aruba. E gremionan ta referi na e scenario cu Hulanda a sigui na 2018 na St Eustatius unda a kita tur poder di gobernacion y parlamento local.
Segun e gremionan, contrario na hopi otro pais, Aruba ta afortuna di tin e oportunidad di haya ayudo di un Hulanda cu ta financieramente fuerte durante un di e crisisnan global mas grave den historia. Den nan vision, “escogiendo opcion 1 y cumpli cu e condicionnan lo pone Aruba den un mihor posicion pa recupera y sali mas fuerte di e crisis aki, a pesar di un periodo di transicion penoso unda temporalmente nos autonomia politico lo ta comprometi.”
