Sindicato Simar a manda un carta pa minister encarga cu Enseñansa pa cera scolnan mas trempan (10 or) y pa un minimo di un siman. Motibo: e calor insoportabel.

 Esaki ta informacion for di un relato di sindicato:

Simar ta haya cu ta’ inhumano pa exigi di un maestro y di su alumnonan pa funciona den e calor inmenso cu tin den e dianan aki’. “Nan no por concentra pa duna enseñansa optimal y e muchanan no por concentra y alabes ta productivo. Tambe nos mester tene salud di tur actor na cuenta. Entre otro muchanan ta perde conocemento, ta haya bloedneus y ta ansha di e calor Maestronan ta keha di dolor di cabes, mareo y presion halto y ta cuminsa bay cu AO cual ta haci e situacion pio.”

E sindicato ta bisa cu e calor ta asota desde salida di solo. “Ta desde trempan e situacion ta bira intolerabel. Simar a dirigi un carta na minister y a haci un apelacion na su persona pa reconsidera e decision di a reanuda e orario di scol. Incluso a propone pa cera scolnan en conexion cu e calor inmenso y si esaki no ta posibel pa en todo caso tene e orario por lo menos te 10:00am, cual ta suficiente pa trata e lesnan principal.”

Na mes momento nan ta urgi pa minister tuma un decision encuanto orario di scol cu pa por lo menos un siman. “Simar ta tene na cuenta cu ley di leerplicht y ta compronde cu scolnan ta preocupa cu les uitval ta ocasiona retraso den preparacion pa entre otro SO nan, pero ta consciente tambe cu e bienestar y salud di tanto alumno , como maestronan ta primordial.


Atake di mayornan
Den caso cu awa yobe mester cera bentana, cual ta converti lokaalnan sin airco den forno. Maestronan cu airco mes ta comenta cu despues di pauze muchanan ta drenta soda y cu curpa cayente den klas, cu ta hisa e temperatura den e klasnan aki, imagina awor esunnan cu no ta den airco. Banda di e situacion di klasnan mester tene cuenta tambe cu mayornan no ta haya espacio suficiente pa haci nan areglonan pa cu opvang di nan yiu(nan). Maestro y cabesantenan ta ricibiendo hopi atake di mayornan pa motibo cu nan ta wordo informa demasiado laat, segun e sindicato.

Simar ta hayando hopi reaccion y ta preocupa pa cu e inkietud cu ta reinando di e situacion aki. Directiva a haci su sondeo y a bin constata cu e pronostico di tempo di meteo Aruba y internacional  ta mustra cu e situacion di calor aki lo dura pa por lo menos 2 siman mas.

“Hopi hende, incluso mayornan di alumnonan, ta cuestiona e hecho cu ta purba di baha e orario di scol, mientras cu ta trata aki di bienestar di e propio studiante. E maestro no lo haya liber  manera cu ta pretende. Su orario di trabou ta sigui normal.”

Simar tambe ta expresa cu nan ta spera cu e proximo gobierno lo tene e situacion actual di enseñansa na consideracion. “No por ta posibel cu den siglo 21, cu tur e factornan pa motibo di calentamento global, ainda ta pretende cu un maestro di scol y su alumnonan mester pasa 5 pa 7ora den temperatura nan fuera di lo normal cu ta varia di 32 pa 42 grado Celsius. Ta di spera cu lo duna enseñansa y su ambtenaarnan e balor cu nan merece via di aloca fondo extra pa cumpli cu tur e condicionnan cu falta pa loke ta siguridad y bienestar, pa asina nos tin miho calidad humano den nos scolnan.”