Carta rabia di gremionan empresarial: Encuanto presupuesto adapta 2020

Gremionan empresarial di Aruba a reacciona negativamente riba e presupuesto adapta 2020, cu ta contene e plan di emergencia pa salvaguardia Aruba financieramente den e actual crisis.

ATIA, AHATA, CKA, Camara di Comercio, ACBA, ATSA y WAB a manda un carta dirigi na Prome Ministro Wever-Croes y ministro encarga cu Finanzas, Asunto Economico y Cultura, Xiomara Maduro, den cual nan ta pronuncia nan desacuerdo cu contenido di e Nota di Cambio (“Nota van Wijziging”) cu a pasa parlamento ayera. Segun e gremionan a plan ta inaceptable y ta pone e posibilidad pa Aruba recupera di e crisis na peligro. Nan ta haya cu gobierno mester realisa cu comercio ta e unico fuente di entrada di e pais y cu na e momento aki ta necesario pa bin cu solucion cu ta trece inversion y actividad economico den comunidad mas pronto posible. Esey anto lo trece empleo di nobo.

E pakete di estimulo den e presupuesto ta abarca un mero Afl. 40 miyon loke ta ni 20% di e suma destina na e plan yama FASE y no ta suficiente. Recomendacionnan cu e gremionan a haci pa mantene cash flow pa negoshi nan no ta mira den e actual proposicion. Ademas e Nota di Cambio no ta contene detaye di e pakete di estimulo.

Tambe ta haya cu e Afl. 2 miyon pa equipo medico y informacion ta mustra poco, a menos cu parti di e gastonan ta inclui den e aumento di gasto pa AZV.

Punto clave pa e gremionan ta cu no tin mencion di baha gasto di personal den sector publico. Ta referi na Prome Ministro mes cu na varios ocasion a bisa cu e crisis ta afecta nos tur y cu tur mester yuda carga e peso. Como posible medida e gremionan ta propone kita e diferente premienan cu e empleado publico ta goza, manera Bashi Premie, Voorjaarspremie y Najaarspremie. Tambe aumento di salario y overbruggingstoelage pa esnan den puesto politico, igualmente e areglo AZV+ y toelage pa terbeschikkingstelling (25%) pa esnan cu ta traha cu e ministronan, y aplicacion di regla di ‘no work, no pay’ y considera reduci salarionan significativamente.

Un reduccion di gasto asina lo reparti e peso mas igualmente entre empleado den sector priva y esnan den sector publico, segun e gremionan. Tambe nan ta enfatisa cu e crisis di coronavirus ta algo cu no ta comparable cu ningun otro cu mundo a yega di enfrenta. E gremionan ta expresa di a demostra di ta dispuesto di colabora pa limita e efectonan desastroso y a largo plazo di e crisis. Sin embargo, ta observa cu atrobe gobierno ta tuma decision unilateral y no ta considera e input di sector priva, ni tampoco a inclui nan den e discusionnan cu ta sigui encuanto medida y alivio necesario. E gremionan ta finalisa bisando cu e Nota di Cambio ta indica cu gobierno no tin comprension pa cu e impacto severo di e crisis riba nos economia, y ta urgi gobierno un biaha mas pa acepta e man cu e gruponan di sector priva ta extende pa yuda logra maximo resiliencia pa e isla.