Den un carta fecha dia 15 di april 2019, Asociacion di Specialista di Hospital di Aruba (ASHA), dirigi na Raad van Bestuur (RvB) di Stichting Ziekenverpleging Aruba (SZA), a expresa nan preocupacion pa e situacion serio den cual segun nan e hospital ta operando actualmente, cu tin consecuencia grave si no ta interveni pa mehora.
ASHA ta cuminsa nan carta bisando cu pa nan organisacion, cuido, continuidad y seguridad di pacient tin prioridad, y cu e deseo di laga e hospital funciona como e miho hospital den nos region a keda formalisa algun aña pasa caba, cu e ‘Raad van Bestuur’ di e tempo ey.
Lamentablemente, segun ASHA, mester observa con toma di decision firme y funcionalidad na diferente nivel dentro di e organisacion, specificamente den RvB, ta fayando den forma creciente y structural, cu (potencialmente) consecuencia desastroso.
ASHA ta expresa su preocupacion pa e situacion cu a surgi actualmente, y cu ta inaceptable, y ta menciona 6 tema principal den cual nan ta haya cu e organisacion ta fayando gravemente.
Banda di ta dispuesto pa duna un man pa drecha e situacion, e organisacion ta haya necesario pa remarca cu, si nan ta sinti cu nan ta insuficientemente envolvi den esaki, nan lo haya nan mes obliga pa involucra Inspectie Volksgezondheid Aruba (IVA) den e asunto. Sin cambio y mehoracion structural, ASHA ta kere cu ta bira mas y mas dificil pa keda apoya RvB.
- Construccion nobo y renobacion di HOH
Segun ASHA, e renobacion a bay acompaña pa falta di consulta structural y solido cu e staff medico. No tin transparencia ora ta trata di tuma decision. Consulta o ‘input’ no ta ser pidi y/o acepta. Un ehemplo doloroso ta e hecho, segun ASHA, cu ta despues cu e contratonan pa e proyecto aki tabata firma caba, nan (ASHA) mester a mustra RvB cu no a inclui un OK nobo den e plan. E planificacion di loke tin na construccion ainda (entre otro e OK) ta ser implementa sin consulta, sin tuma obhecion di ASHA na cuenta.
Despues di mudamento di cierto departamentonan na e parti nobo a elimina varios cama. Como consecuencia a haya un ocupacion completo, y repetidamente mester cancela tratamento y operacion. Tambe tin pacient manda cas prome cu ta medicamente responsable. A pesar di obhecion di ASHA, ta parce cu atrobe e directiva tin e firme decision pa atrobe elimina extra cama den e reconstruccion di e ultimo parti.
Tambe pacientnan ta drumi regularmente pafor di e seccion unda na mester ta, loke ta haci atencion y cuido medico mas dificil.
E listanan di espera ta creciendo, y e necesidad di cuido medico specialisa for di comunidad ta creciendo, y ASHA ta constata cu nan ta ser informa laat, hopi biaha eroneamente, y regularmente nan no ta ser consulta mes tocante e maneho planifica di RvB.
2. Retiro director financiero y incertidumbre financiero
ASHA ta referi tambe na e retiro reciente di e director financiero, sin anuncio y sin splicacion di e motibo. Mientras cu ASHA ta consciente di e hecho cu nombramento di un miembro nobo no ta competencia di RvB, ta señala e situacion unda e director general ta e unico miembro di RvB, y cu e situacion aki no por keda asina. Tin hopi asunto cu a keda benta caba sin decision, e temor ta cu esey lo bay sucede mas ainda, unda ta trata decisionnan crucial cu mester tuma. A pesar di esey no tin noticia ainda di un vacatura. A comprende di Raad van Toezicht (RvT) cu lo apoya e directiva, pero no ta mira nada den maneho di directiva. Ta pidi mas transparencia y ta mustra riba urgencia di un director financiero nobo.
3. HR y recluta y nombra miembro nobo di staff
ASHA ta preocupa tambe pa e forma con ta maneha e reclutacion y nombramento di colega specialista nobo. ASHA tin comprension pa e hecho cu no ta un tarea facil pa busca staff medico nobo, pero ta ripara cu cada biaha atrobe ta tarda cu saca vacatura, loke ta aumenta e presion riba e specialistanan actualmente trahando. Tambe ta observa un trato menos profesional pa candidatonan pa bin traha na Aruba, cu ta haci cu nan ta dicidi di no bin Aruba, y cu otronan trahando caba ta termina nan contrato prome cu tempo.
Tambe ASA ta referi na e caso di e oncologo cu a bay di Aruba, sin cu tin (temporalmente) un oncologo practicando na Aruba. Ta spera un supervision mas fuerte riba Recurso Humano (HR) di banda di RvB, cu consulta structural cu ASHA pa cu e progreso di e procesonan andando.
Keho tambe tin tocante maneho di permiso di residencia pa e empleadonan cu mester bin di exterior. ASHA ta dispuesto pa, hunto cu hospital, duna un señal cla na politica, pa loke ta importancia di un maneho diligente di permiso. Tin specialista ta trahando na HOH sin cu nan tin permiso. Esaki tin como consecuencia cu e personanan aki no ta sigura na AZV, algo totalmente inaceptable.
4. Caos den departamento di compra y problematica di inventario
ASHA ta sumamente preocupa pa e situacion di inventario di medicamento y otro materialnan necesario. Hopi biaha materialnan esencial no ta den stock, y ora haci pregunta, no tin claridad pakico. E maneho di compra ta indica cu e departamento no ta coordina bon cu e experticio y necesidadnan di esnan na trabao den e organisacion.
Tin mas y mas señal cu proveedornan no ta entrega material mas pa via di e retraso den pago. Aparatonan disponible no ta funciona bon, y/o despues cu nan ta amortiza no ta reemplaza nan na tempo. Ora ta cumpra aparato nobo, no ta tene cuenta cu e experiencia y experticio di esnan cu finalmente ta bay usa e aparatonan. Seccionnan di apoyo, manera laboratorio, ta mustra un falta di continuidad, pa falta di medio o pa motibo di aparatura daña.
ASHA ta mustra cu e situacion cu a surgi por conduci na situacionnan peligroso, cu por a evita si tabatin un bon colaboracion.
5. Calidad di laboratorio menguando
Experiencia general ta cu e calidad di tur laboratorio ta gravemente bao presion. Esaki ta expresa na diferente manera: test kitnan hopi biaha no t’ey, o no ta yega unda mester yega, y tin biaha cu sistemanan critico no ta funciona. E cantidad di calamidad ta aumentando, tambe pa e uso di sistema sumamente anticua y uso di personal sin experiencia. Ta bira mas y mas dificil pa convence pacientnan policlinico pa haci nan test di sanger na hospital mes, pasobra nan ta haya mihor servicio na laboratorionan externo.
6. Posposicion di ‘Elektonisch Voorschrijf Systeem’ (seguridad di medicacion)
Comisionnan cu participacion di henter hospital a conseha pa pasa mas pronto posible pa un sistema ‘EVS’. E conseho ta surgi di e hecho cu un analisis di riesgo di e actual sistema di papel ta mustra cu ta comete un cantidad grave di eror den prescripcion di medicamento, loke por observa practicamente tur dia, y cu den cierto caso a conduci na calamidad. Te awe ainda no a scoge pa un EVS, motibo pa cual ta keda existi un riesgo grandi di calamidad cu por a evita.
Finalmente, ASHA ta señala cu si no tin reconocimento di e problematica actual y serio manera treci dilanti, y un colaboracion responsable, coordinacion di contenido formal, transparencia den asuntonan y un comunicacion directo y habri no ta bira realidad, nan ta mira nan mes obliga pa pone RvB responsable. Anto ta keda un situacion den cual e calamidadnan señala ta inevitable.
