Ayera lider di fraccion Accion 21 den Parlamento di Aruba, Miguel Mansur, a dirigi un carta na Prome Ministerdi Aruba, Evelyn Wever-Croes, den cual e ta manda preguntanan por escrito cuestionando e integridad den e aparato gubernamental.

Parlamentario Mansur a acerca Prome Minister, como e minister encarga cu asuntonan di personal di gobierno y bao cual Departamento di Recurso Humano (DRH) ta resorta, pa trece pa dilanti su preocupacion pa loke ta un supuesto situacion delicado cu ta toca e tema di integridad den e aparato gubernamental.

El a splica cu recientemente nan a tuma nota di e circulario ‘maatregelen tegen niet-integer gedrag’ (medidanan contra comportamento no etico) di 18 juli 2023, DRH no. 59787, 995/23, cu a wordo firma pa Prome Minister.

Mansur ta remarca cu den e circulario aki hopi poder ta ser otorga na e director di DRH den cuadro di accionnan disciplinario y tambe pa loke ta trata atende cu comportamento di trahadonan publico cu no ta ser considera no integro

El a indica cu fraccion Accion21 a mira diferente declaracion cu a ser entrega contra DRH, incluyendo contra e actual director, pa actonan cu aparentemente ta contra ley y cu no ta cuadra cu un maneho integro.

E parlamentario a splica den su carta cu un decision di Corte Comun di Husticia di Aruba, Corsou, Sint Maarten y di Bonaire, Saba y Sint Eustatius a reconoce e existencia di persecucion politico den un caso ey unda cu aparentemente un persona a constata actonan ilegal tumando luga den maneho di personal di gobierno y a entrega un keho na unda e actual director di DRH ta involucra.

El a sigui splica cu Ministerio Publico a dicidi cu no ta bay no persigui e keho y e caso a caba te na HOF. Decision di HOF ta cu no por obliga Ministerio Publico persigui un caso, pero tambe a constata cu e persona cu aparentemente a sigui ley y entrega keho a sufri persecucion for di e director di DRH como represalia y, segun e parlamentario, esaki ainda ta continua.

“Nos fraccion a ricibi hopi persona den situacion similar, cu nan ta wordo persigui politicamente y na Parlamento mes nos tabatin un caso cu ta involucra no solamente DRH di aparantemente ta

Complice, pero tambe bo persona. Mirando e base di corelacion entre e circulario y e decision di

HOF, nos fraccion ta convenci cu e actual Director di DRH no ta e miho persona pa ta envolvi den consehonan y ehecucion di decisionnan tocante integridad,” Mansur a enfatisa.

Cuestionando e integridad di e aparato gubernamental, e parlamentario di fraccion Accion21 a manda un serie di pregunta pa Prome Minister pa asina por tin claridad ariba e situacion aki.

Mansur remarca cu su fraccion ta desea claridad y un splicacion di parti di Prome Minister pa loke ta e ehempel cu un persona cu un reputacion dudoso por tin pa ehecucion di e maneho di gobierno pa cu e tema di integridad.

El a trece pa dilanti tambe e pregunta tambe cuanto conseho e departamento bao direccion actual a formula cu tambe ta contra ley y/of cu no ta cuadra cu un maneho integro.

El a indica cu den Parlamento di Aruba su fraccion a yega di trece pa dilanti nan preocupacion ariba e hecho cu no tin ningun hende controlando e director di DRH y cu ta existi un cantidad di conflicto di interes cu ta mina confiansa den gobierno y Parlamento su capacidad pa eherce control, pa no papia di otro instancianan.

Como ehemplonan el a trece pa dilanti cu segun e por a compronde landsrechecherce ta depende riba DRH pa nan promocion, algun hues ta depende indirectamente ariba DRH su conseho pa nan posicion legal, Ministernan ta depende riba DRH pa nan nombramento- y promocionnan desea politicamente, entre otro.

Pa cu esaki, el a puntra cu su fraccion ta desea di conoce con Prome Minister lo atende cu e conflictonan di interes cu ta pone un maneho integro di DRH na peliger.

Mansur a menciona cu, segun su comprendemento, desde 1995 sindicatonan a entrega un plan pa independisa Departamento di Recurso Humano. El a agrega cu te awe nombramentonan politico ta sigui, funcionnan ta ser crea specificamente pa un candidato keda nombra y profesionalnan den sector publico no tin motivacion pasobra e cargo di director ta pa esnan yega na un partido.

El a resalta cu den Parlamento mes nan a wak rotacion di ex parlamentario pa director di un departamento sin cu nan ta necesariamente e persona mas apto pa e trabao.

Riba esaki el a puntra Prome Minister si e ta pensa cu e introduccion di un prohibicion pa ex politico ocupa puesto di director di departamentonan publico pa un periodo di cinco aña despues di nan retiro lo por ta un posible solucion pa reduci e conflictonan di interes.

E parlamentario a señala den su carta cu nan ta mira con campañadonan ta haya contract di trabao na departamentonan cu ta resorta bao un minister cu nan a sostene durante eleccion y pa esey por sucede, el a subraya, DRH mester ta complice.

Por ultimo el a puntra cu su fraccion kier sa si Prome Minister ta pensa cu e construccion actual, cu tur e deficiencianan, conflictonan di interes y e tantisimo casonan cu ta pone den cuestion e integridad di e director, ta e miho manera pa procede.