Ayera mainta, pa di tres biaha caba den un siman, gerencia di TeleAruba a reuni cu representante di FTA na oficina di mediador di gobierno. E meta di e reunion aki tabata pa busca un acercamento entre ambos partido pa atende e solicitud haci pa mayoria di e trahadonan cu kier wordo representa sindicalmente door di FTA.

Mediador di gobierno, Anselmo Pontilius, a declara na Bon Dia Aruba cu e partidonan a discuti e parti legal di e referendum. Un di nan tin di haber si mediador ta publica e proceso di convocatorio di e referendum, tin un periodo di 14 dia cu legalmente mester tin cuenta cu ne, ya cu e ta duna e posibilidad pa un of mas sindicato por inscribi pa participa den e referendum aki. Aunke mayoria di trahado a yega di firma e formulario pa FTA representa nan manera ya caba a yega di sosode den pasado, no mester lubida cu nan tabatin un acercamento cu sindicato STA tambe.

Sr. Pontilius a indica cu den principio tanto gerencia di TeleAruba como FTA a bay di acuerdo cu e plaso di 14 dia pa publica e anuncio di e referendum. Sinembargo den principio e ta un palabracion haci ya cu FTA a laga sa cu si gerencia ta acepta e parti aki di e plaso legal di 14 dia, gerencia tin cu acepta cu si niun otro sindicato no inscribi pa participa den e proceso di referendum, no mester warda otro proceso mas largo pa reconoce e sindicato.

Incluso a wordo papia di e fechanan tentativo di 21, 22 y 23 di augustus pa defini e situacion di e afilia di e trahadonan di TeleAruba na sindicato FTA. Sr. Pontilius a laga sa cu considerando cu ayera tabata 31 di juli y cu e plaso legal inicial pa anuncia un referendum ta 14 dia, esaki kiermen cu e fechanan anuncia ariba ta rond di loke a wordo papia ayera.

Gerencia di TeleAruba cu ta resorta bou di Setar a keda di discuti e asunto aki internamente. Si esaki ta e caso cu nan ta bay di acuerdo cu e fechanan aki, ambos partido mester firma un documento. Sr. Pontilius no a descarta cu e anuncio di e referendum lo sali den e proximo oranan.

“Nos ta pendiente pa haya esakinan y si esey ta e caso, lo tin un referendum na TeleAruba pa e trahadonan cu te aworaki FTA kier representa nan”.

Nan ta entre 18 pa 20 trahado, pero si ta exclui algun miembro di staf lo ta entre 14 pa 15 trahado cu derecho di voto. E mediador a declara cu gerencia di TeleAruba a saca un comunicado informativo pa e trahadonan y tambe nan a manda un carta via nan abogado pa mediador di gobierno, cu nan a trata durante e reunion di ayera. El a bisa cu sindicato no a bay di acuerdo cu e proposicion of periodo estableci den e carta y p’esey nan a sondea e posibilidad di otro salida.

FTA a yega di expresa su deseo pa gerencia reconoce nan como e sindicato di nan trahadonan sin mester di celebra un referendum, ya cu mayoria di trahadonan a expresa nan boluntad di afilia na e sindicato aki. Pero te ainda gerencia di TeleAruba no a honra e solicitud cu FTA a haci den nomber di e trahadonan di e planta nacional di television.

Di otro banda Bon Dia Aruba a haya sa cu e carta di e gerencia di TeleAruba, caminda nan a pidi e trahadonan keda trankil pa e proximo dos luna, no a cay den bon tera cerca e trahadonan cu no kier pa nan deseo di afilia na FTA wordo prolonga pa mas tempo. E ambiente laboral a bira mas pisa ora cu nan a instala camara extra den TeleAruba y awor na luga di un miembro di siguridad tin dos. Ora empleadonan puntra dicon mas personal di siguridad, a bisa cu ta door di sindicato. Esun cu a duna ordo pa pone mas personal di siguridad ta ex president di sindicato STT; empleadonan ta mira esaki como intimidacion.