E lider di AVP, mr. Mike Eman a manda un carta pa Secretario di Estado pa Asuntonan di Reino, Raymond Knops, haciendo un apelacion urgente pa facilita Aruba cu mas vacuna.

Na prome luga e lider di partido AVP a expresa di ta masha agradecido pa a laga Aruba participa den e strategia di vacunacion di Hulanda. Asina mes e cantidad di pashent hospitalisa pa motibo di COVID-19 y tambe e casonan di morto relata na e virus, ta subi a base diario. Riba dje specialistanan ta indica cu e tratamentonan rutinario ta menos efectivo pa loke ta e variantenan nobo, e lider di AVP mr. Mike Eman a splica e mandatario Hulandes su preocupacion y di su partido den e carta.

Tambe Eman ta mustra cu mantene un metro y mey di distancia, bisti tapaboca y haci uso di otro reglanan higienico manera laba man regularmente y usa desinfectante, ta mustra di no ta suficiente mas pa evita olanan nobo di e virus. Solamente un strategia pa vacuna lihe y den forma efectivo por percura pa un recuperacion robusto di nos economia, e relacionnan social y salud publico, Eman ta splica den e carta pa Knops. Sigur den un economia habri, cu contrario na Hulanda y otro paisnan dentro di Reino, ta depende riba un solo pilar cu ta turismo e ta urgente pa Aruba logra un porcentahe halto di ciudadanonan vacuna mas liher posibel.

Como un isla chikito cu un comunidad chikito, un strategia di vacunacion na gran escala y den termino corto por wordo ehecuta facilmente y di e forma aki limita e cantidad di morto, contagio y e daño structural na nos economia, Eman ta accentua den su correspondencia cu Secretario di Estado pa Asuntonan di Reino, Knops. Caida di turismo den un economia cu ta depende pa 80% di e pilar aki, ta hinca Aruba den un situacion financiero economico sumamente malo.

Hopi empleado den e sector priva ta bibando pa mas di un aña caba di un entrada limita y ta depende di pakete di cuminda di Rode Kruis, ambos financia dor di Hulanda. Nos kier salva Aruba for di e situacion aki mas liher posible y esey ta unicamente posible cu vacunacion di nos comunidad completo e Ex Promer Minister di Aruba, mr. Mike Eman ta accentua.

Eman ta mustra cu internacionalmente a keda demostra cu un recuperacion economico y social ta relata directamente na un strategia di vacunacion unda den un tempo cortico ta vacuna mas tanto hende posibel. Ehempelnan exitoso ta Merca, Inglatera y Israel. Dor di e dependisacion grandi di turismo pa loke ta recuperacion economico di Aruba un maneho efectivo y acelera di vacacunacion ta di sumo importancia.

E relacion di un strategia di vacunacion diseña pa Aruba, e recuperacion di nos economia ta evidente, mr. Mike Eman ta accentua.

Pa medio di e carta aki Eman ta haci un peticion riba e mandatario Hulandes Knops pa trata na move e gobierno di Aruba pa bin cu un maneho mas accelera di vacunacion cu ta basa riba recuperacion di economia y turismo di Aruba y percura pa mas hopi vacuna yega y mas lihe aki. Asina e recuperacion ta bay mas rapido dor di cual e economia y finanzas publico di Aruba por bai na recupera. Esaki ta locual e Lider di AVP, mr. Mike Eman ta invatisa den su carta pa Knops