Cu fecha 25 di mei 2020, cabesantenan di un serie di scol publico a manda un carta pa Ministro Presidente, Evelyn Wever-Croes, pa expresa nan preocupacion relaciona cu e plannan di austerisacion di ministro encarga cu enseñansa, dr. Rudy Lampe.

E cabesantenan di e 16 scolnan publico, reuni den e Hoofdenoverleg Openbaar Onderwijs (HOOO), ta expresa cu pa nan desapunto nan mester a tuma nota di e plannan di austerisacion pa enseñansa publico di e ministro, a traves di medionan di comunicacion. Nan ta observa cu “sigur den caso di un cambio di vision y maneho, mester di comunicacion directo, cu e debido respet y abiertamente. E ‘draagvlak’ cu e ministro ta desea por ser crea solamente a traves di duna un voz na esnan envolvi den e futuro di e scolnan, despues di kita incertidumbre tocante nan ‘rechtspositie’ y a traves di aprecia e conocimento y experiencia di e directornan, y dunando espacio pa determina nan propio accion y traha acuerdo conhuntamente.”

E firmantenan ta enfatisa cu e scolnan ta diferencia di otro, ‘di alumno, di edificio te na e directivanan di scol’. Esey ta segun e firmantenan e stempel cu e alumno, docente, direccion y directiva di scol ta pone riba e cultura di e scol. Ta argumenta cu ta e aspecto unico aki ta bay perdi den un eventual fusion.

Tambe ta referi na e caracter unico di un scol publico, unda tur hende ta bonbini y no tin ‘seleccion na porta di scol’. Ta trece dilanti cu den e scol publico enfasis ta mas bien riba e proceso di enseñansa envez di e producto final. “Ta pa docentenan den enseñansa publico, hopi biaha den e barionan mas pober, cu tin biaha cu mucha dificil di educa, ta un prestacion grandi pa logra e mesun resultado cu nan coleganan den enseñansa particular unda tin regla mas estricto pa drenta . Pa e motibonan aki ta pa HOOO incomprensible cu net e Ministro, cu mester ta un bon tata pa enseñansa publico, ta parce di ta trata su yiunan di manera asina indiferente.”

Tocante e austerisacion cu e ministro kier implementa, e firmantenan ta bisa cu ‘e ministro kier logra esey invirtiendo menos den enseñansa, pero tambe, manera ta resulta awor, a traves di fusiona scolnan cu ta pertenece na Stichting Protestant Christelijk Onderwijs (SPCOA), unda tin cada vez menos mucha ta registra, cu scolnan publico’. “Con esaki ta bay mustra, y kico alumno, mayor, docente y cabesantenan ta pensa di esaki, ta parce di menor importancia pa e Ministro.” Segun e firmantenan, e forma den nan vision riguroso y no bon pensa di austerisa, ta haci cu nan tin e temor cu lo tin perdida di calidad den enseñansa publico. Tambe nan ta señala cu asina leu cu nan sa, no tabatin investigacion encuanto e impacto cu e plannan di austerisacion di e ministro lo tin riba enseñansa publico.

Concluyendo e firmantenan ta argumenta cu segun nan no tin un necesidad cla pa pusha plannan di austerisacion di e ministro y ta boga expresamente pa no pasa pa fusiona e scolnan cu e ministro tin na vista. Ademas nan ta conclui cu no tabatin consulta entre e ministro y e cabesantenan y ta haya tambe cu pa via di e crisis di coronavirus e aña escolar 2021 no ta e aña ideal pa implementa e cambionan proponi.

Ta haci un suplica na Ministro Presidente pa para e cambionan proponi pa e aña escolar 2020-2021, y en todo caso no implementa nan, promer cu tin consulta cu e cabesantenan. Enfatisando un biaha mas e situacion diferente na cada scol , cu nan problemanan specifico, a añadi un anexo den cual ta detaya mas aleu e diferencianan pa e promer mandatario.

E carta tabata firma pa abogado di e grupo di cabesante, mr. Desiree Croes. Tambe e carta tabatin copia manda pa parlamento.

Nota di redaccion:

E scolnan firmante di e carta aki ta: Colegio San Nicolas, Abraham de Veerschool, Julianaschool, Ceque College, Hilario Angela Basisschool, Arco Iris Kleuterschool, Comm. Pieter Boerschool, Emmaschool, Scol Preparatorio Washington, Scol Basico Washington, Fontein Kleuterschool, Scol Primario Kudawecha, Reina Beatrixschool, Scol Paso Pa Futuro, Prineses Amaliaschool, Scol Basico Conrado Coronel.