Ayera mainta, presidente di Stichting Rancho, Clifford Rosa a haci entrega di un manifiesto of carta na departamento Consular di Gabinete di Gobernador di Aruba, hunto cu Sr. Gerald Franca y Sra. Yosmar Sneek, kendenan ta miembronan di e directiva di e fundacion aki.

Stichting Rancho pa medio di e carta aki ta pidi pa para e trabao un rato den e area di Schoenerhaven pa asina nan por yega na mesa cu tur e diferente stakeholder cu tin di haber cu entre otronan, ministernan, ministerionan y departamentonan.

Den principio nan kier sa kico ta bay sosode den e area di Schoenerhaven, unda nan ta sinti cu cada bes mas e acceso publico ta wordo limita. El a menciona cu e unico proposito di fundacion Rancho ta conservacion di historia y cultura di Rancho. Conserva e kiermen cu Stichting Rancho kier e maneho di Schoenerhaven y markthallen. Y asina hunto cu e inversionista cu tin den e area aki, y tambe cu Aruba Port Authority (APA), DOW y otro instancianan pa asina cera cabes pa un proyecto integral.

Conservacion

Actualmente Stichting Rancho tin 10 aña di existencia y den nan statuut ta poni tambe, entre otro proteccion y mehoracion pa e piscadonan di Rancho cu ta algo cu den transcurso di e añanan nan a bin boga pe. Ta asina cu nan a yega di participa den reunion di Parke Marino y tambe den diferente reuni concerni na e piscadonan.

Rosa a laga sa cu desde cu e inversionistanan di ex edificio Mar Azul a inicia cu e proceso relaciona cu nan inversion, e fundacion a laga nan sa e importancia cu e area di Schoenerhaven tin pa e comunidad di Rancho, y muy specialmente pa e piscadonan. Nan no ta contra di e desaroyo, y tampoco contra embeyecemento di e area cu e ta considera cu ta un deber di e inversionistanan. Pero e punto central ta con nan ta bay haci’e.

E fundacion aki ta spera cu nan por tuma un decision mucho mas miho di locual a wordo tuma caba. Pero Stichting Rancho ta dispuesto pa sinta na mesa, hunto entre otro cu APA y inversionista, pa yega na ultimo palabracion por escrito. Nan kier un garantia preto riba blanco cu por garantisa e acceso di e piscadonan y comunidad cu ta bin cumpra pisca for di Waf’i Rancho. Un actividad cu ta parti di nan herencia cultura y un sitio cu ta forma parti di nan patrimonio historico cu nan ta wak cu ta bayendo perdi.

“Ta imposibel cu nos por tin patrimonio, anto bo no tin acceso pa yega na dje,” segun Rosa.

Accion di firma

Despues di un accion di firma cu a tuma luga durante fin di siman na Waf’i Rancho, nan a dicidi di entrega e manifiesto aki hunto cu mas cu 150 firma colecta ayera na Gabinete di Gobernador. Diahuebs como bestuur nan a firma e carta y nan intencion ta cu no solamente na Gabinete di Gobernador nan ta entreg’e, sino na otro instancianan gubernamental tambe.

E fundacion aki como representante di e comunidad di Rancho y como stichting ta cuminsa un proceso di proteccion. “Nos ta pidiendo masha tempo caba proteccion pa cierto areanan cu tin di haber cu nos herencia cultural y esaki sigur ta un di nan cu aworaki nos ta tumando un paso mas avansa,” el a bisa.

Rosa a declara cu pa medio di e carta aki nan ta haci un peticion pa pone mas atencion riba conservacion di nan historia y cultura di e bario historico di Rancho, special den un area cu ta importante pa e desaroyo di Aruba.

El a bisa cu nan como Stichting Rancho no ta contra di desaroyo, sino nan ta contra riba e forma con esaki ta wordo haci, sin tene cuenta cu e comunidad di Rancho su historia y cultura. Nan ta rechasa e hecho cu cada bes mas e acceso di e comunidad di Rancho den e area di Schoenerhaven ta birando mas limita. Tin cierto trabao cu e renobacion di un edificio di condominio cu ya caba esunnan cu tin nan boto mara den e Waf’i Rancho ta bira mas dificil pa transita den e caminda publico aki.

Stiching Rancho ta mira cu cierto preocupacion cu ta wordo papia pa hopi tempo di un proyecto integral di Port City, pero nan ta wak cu comunidad a keda totalmente afo. P’esey como representante di fundacion Rancho, y tambe pa esunnan dedica na e sector primario di piscamento, nan ta trece nan preocupacion. Ya cu e luga caminda e ta haci referencia patras di e markthallen of ex mercado di fruta y berdura, e area marino ey ta un refugio pa ora cu lama ta bira malo e piscado di cualkier districto cu no kier saca nan boto, ta bin refugia den e Schoenerhaven aki.

“E ta sumamente importante pa cualkier desaroyo cu lo por bin den e area aki di haven front di APA por wordo bon presenta y bon investiga.” el a declara na Bon Dia Aruba.