Fundacion Aruba Birdlife Conservation, por medio di su presidente drs. Greg Peterson, a manda un carta abierta na Conseho di Ministro y Parlamento di Aruba, pa expresa nan preocupacion tocante e actual desaroyo turistico no sostenible na Aruba. Den e carta e fundacion ta pidi un estudio profundo pa analiza e situacion for di diferente angulo profesional. Seguidamente e texto integral di e carta, cu originalmente ta na Hulandes.

(Traduccion: redaccion Bon Dia Aruba)

na

Conseho di Ministro, via Minister Presidente di Aruba

Y

Parlamento di Aruba, via presidente di Parlamento di Aruba.

29 januari 2024, Oranjestad, Aruba

Asunto: Peticion pa diseño y ehecucion di un investigacion integral pa cu e efectonan y e impacto di expansion di acomodacion na Aruba.

Apreciable Minister-Presidente, y apreciable Excelencianan,

Cu profundo preocupacion encuanto e desaroyo sostenible y futuro bienestar di e habitantenan di nos isla stima Aruba, mi ta dirigi mi na bo persona den mi calidad di presidente di Aruba Birdlife Conservation. Ta danki na e buniteza natural di nos isla y e calor autentico di nos comunidad cu Aruba den transcurso di aña a bira un di e destinacionnan mas renombra na mundo. Sin embargo, e actual trayecto di expansion di acomodacion planifica, continuo construccion di hotel y crecemento sin freno y sin regulacion di turismo ta yama preocupacion significante cu ta exigi atencion y accion inmediato di bo persona como liderazgo Arubano.

Danki na varios estudio haci pa loke ta crecemento di turismo den e ultimo decadanan ta mas cu claro pa bastante tempo caba cu e actual modelo di crecemento continuo y no controla den turismo, y e expansion relaciona cu esey di acomodacion y desaroyo di hotel no ta sostenible, ni a corto, ni mediano ni a largo plazo. E resultado di e modelo (obsoleto) di crecemento pa turismo aki ta destrui e patrimonio hopi special – nos medio ambiente natural, nos harmonia social y integridad cultural – cu ta haci Aruba unico. Ademas ta reconoci caba cu e trayecto aki di crecemento turistico continuo ta conduci na un reduccion di e calidad di bida di e habitantenan di nos isla y pesey finalmente ta haci daño na e experiencia di e bishitante cu ta elemento central den nos industria turistico.

Den e cuadro aki mi ta pidi bo respetuosamente pero cu urgencia pa, segun encargo di e pais laga ehecuta un estudio amplio, integral y multidisciplinario encuanto e impacto di continuacion di construccion di hotel y expansion turistico na Aruba. E necesidad di un estudio asina ta ser enfatiza pa e caracter compleho di e impacto di expansion turistico cu mester comprende, cu ta encera dimension economico, ecologico, social y di infrastructura. Un acercamento integral y a largo plazo ta esencial pa por haci visible e efectonan compleho y variable segun tempo.

E obhetivo primario di e estudio proponi ta pa evalua efecto directo como indirecto riba tereno socio-economico y medio-ambiental, di e continuacion di construccion di hotel. Ta importante pa den esey traha cu varios indicador obhetivo y normanan cientifico. E estudio idealmente lo mester atrae experto di diferente tereno profesional, entre nan economia, urbanismo, sociologia, salubridad publico y mas, pa por garantiza un analisis holistico. Ta di esencial importancia cu den e estudio aki no ta investiga solamente e efectonan a corto plazo, sino cu ta atende tambe e efectonan indirecto a mediano y largo plazo y e implicacionnan di un ‘segundo ola’. Un tal acercamento amplio ta di vital limportancia pa por comprende e gama completo di consecuencia cu nos actual modelo di turismo ta ocasiona.

E esfuerzo investigativo aki ta exigi colaboracion entre diferente institucion local manera turismo y institucion liga na turismo, Banco Central di Aruba y Oficina Central di Estadistica pa dato valioso, banda di experto internacional pa perspectiva mas amplio y experticio specializa. Envolve grupo comunitario, empresa local y explotante turistico lo percura pa punto di vista divesro y perspectiva diferente lo keda recogi y considera, loke lo conduci na resultado mas equlibra y mihor informa.

Resultado di e estudio aki mester keda estableci den un tapport detaya, cu informacion comprensivo y recomendacion pa maneho, apoya pa medionan auxiliar visual pa por comunica resulatdonan di manera efectivo. Ta di crucial importancia cu e estudio ta propone un cuadro di maneho pa desaroyo turistico sostenible, unda crecemento economico, sostenibilidad ambiental y bienestar social y comunitario, y e interaccion entre esakinan ta ser visualiza.

E falta di conocimento riba e terenonan menciona aki riba ta fortifica mi conviccion cu e estudio aki no ta solamente necesario, sino urgente tambe. Futuro di comunidad di Aruba ta depende di nos capacidad pa tuma decision bon informa cu ta pone salud y properidad a largo plazo di e sistema ecologico di nos isla na prome lugar. Nos no por afford di keda riba un rumbo di desaroyo sin por comprende e tipo di implicacion aki completamente.

Bao di bo liderazgo aprecia Aruba lo por crea un precedente importante relaciona cu desaroyo turistico responsable y sostenible, unda nos isla ta keda pa e actual y futuro generacionnan un comunidad activo, incluyente y floreciente.

Danki pa considera e peticion aki. Mi ta keda pendiente di por consulta e posibilidad aki mas den detaye cu bo persona o cu miembronan relevante di bo team.

Atentamente,

Greg Peterson

Aruba Birdlife Conservation