Kico a cambia den 13 aña?

Aruba Tourism Authority (ATA) a tuma iniciativa pa reactiva e concepto di ‘Carrying Capacity’ mediante un encuesta bao di poblacion di Aruba. Un bon iniciativa, mirando cu den tur e añanan despues di e debate treci dilanti den e esfuerso anterior di Universidad di Aruba, CBS, IPA y Camara di Comercio, no tabata scucha tanto mas di e concepto aki, pero esey no ta significa cu e no tabata relevante. En realidad, e tabata t’ey henter ora, specialmente pasobra varios intento pa aumenta crecemento economico tabata nada mas cu conta e comunidad cu tabatin pensa, atrobe, pa traha mas hotel… Y e reaccion den comunidad hopi biaha, sin menciona e dos palabranan ey, tabata di: “Mas hotel? Ma nan mes no ta mira cu e luga aki ta yen caba…” Esey tabata un indicacion cu algo a keda pega den mente di hopi hende, cu tabata mira y reconoce cu e solucionnan cu tabata bin dilanti, den gran mayoria no tabata cuadra cu e reglanan basico di desaroyo sostenibel cu mester respeta. Pasobra basicamente carrying capacity no ta nada otro cu tene cuenta cu loke bo por haci, si bo kier mantene un desaroyo sostenibel y duradero. Lastima cu e concepto desaroyo sostenibel a keda prostitui durante ocho aña pa un gobierno cu no tabata haci nada den e direccion ey, al contrario. Hasta un refineria ‘berde’ nan a purba bende nos, cu awe a resulta di ta e desaster mayor cu nos mester bay ruim op den e proximo añanan y bin cu algo cu berdaderamente ta sostenibel.

Na 2005 e esfuerso conhunto di e entidadnan menciona a resulta den un encuesta cu a duna hopi informacion tocante con Aruba tabata pensa riba hopi asunto, no solamente tocante desaroyo socioeconomico, sino tambe riba otro aspecto mas den sentido di bienestar general. Pa esunnan interesa e documento aki te awe ta disponibel riba website di KvK: arubachamber.com/downloads/Carrying Capacity. Loke a atrae nos atencion di e publicacion aki ta un resumen di kico e encuestadonan a haya importante mirando dilanti pa e proximo cinco aña.

Punto number un tabata: Atencion pa hubentud, relaciona cu atencion pa (sistema di) enseñansa. Despues ta sigui problematica di alcohol, droga y choller, liga na criminalidad y siguridad publico; despues costo di bida, economia y empleo, y salud. Nos no ta bay anticipa kico e encuesta nobo lo trece, tambe pasobra nos no sa si e set up di e investigacion ta asina cu por haci comparacion cientificamente valido. Pero en general loke ta aparece como preocupacion 13 aña pasa, ta mas o menos loke nos a mira atrobe den e debate publico durante y despues di eleccion. Sigur loke ta resalta ta e enfasis riba atencion pa hubentud, cu tabata, cu bentaha grandi, e punto mas menciona den e encuesta di 2005. Nos por conclui cu desde e tempo ey, nos avance tabata hopi limita, tanto den e atencion directo pa hubentud como den e cambionan necesario den enseñansa.

Sinembargo, tin un aspecto riba cual e encuesta nobo lo por ta un mehoracion, y esey ta e debate encuanto kico ta actividad economico sostenibel y kico no. Pasobra ta aki ta unda tur cos ta cuminsa: bo mester basa bo comunidad riba actividad economico, cu tin un fundamento sano y fuerte, cu no ta crea daño. Sea daño na e actividad economico mes, o na otro aspecto, contal cu a lo largo e actividad economico mes no por sobrevivi. Y den e sentido aki lo ta interesante pa puntra nos mes si e actividadnan economico cu nos tin ta sostenibel, y si nan no ta, kico por haci pa nan alcansa e punto di ta sostenibel. Laga nos cuminsa cu turismo mes, ya cu esey ta di cual mayoria di nos ta gana un pan, sea directo o indirecto. Hopi biaha nos ta tende cu turismo ta un negoshi riesgoso, cu por cambia di nochi pa mainta, segun e gusto di e clientela. Nos ta tribi di cuestiona esaki. Nos por mira atras 10 aña, tempo cu e crisis economico y financiero mas grave desde añanan 30 di siglo pasa a sacudi mundo. Nos tabata ‘back on track’ hopi mas lihe cu hopi pais cu sector clave di economia cu no ta turismo.

Esey no ta implica cu no tin riesgo, y ta importante conoce y limita e riesgonan. Tin hopi cos cu nos por haci pa mehora nos pais como destinacion, y esey no necesariamente ta concerni drecha e infrastructura turistico mes. Unda nos ta fayando ta unda nos no ta tuma rienda pa mehora e infrastructura di e parti unda nos mes ta biba. E tarea ta simpel y costoso: converti Aruba den e destinacion mas limpi y mas ordena di Caribe, unda ta un placer pa biba y un placer pa bishita.

Pero, pa bolbe na e tema di inicio, cu cual nos por yena varios editorial, djis esaki. Na 2005 Aruba tabatin alrededor di 97.500 habitante. Actualmente nos tin sigur como 15.000 mas. Nos ta na 600 habitante pa km cuadra y nos ta sigui yena Aruba cu empleo barata. Un bon prome tema pa debate serio den cuadro di Carrying Capacity?