Ayera atardi, Fundacion Anti Droga Aruba (FADA), Departamento di Aduana, Wit Gele Kruis Aruba y Consultorio pa Asuntonan di Adiccion (CAA), a tene un conferencia di prensa pa e medionan local pa duna di conoce e union di e instancianan aki pa loke ta trata Carrousel 2020 den temporada di Carnaval.

Rulienne Arends di FADA a expresa cu esaki ta dirigi specialmente pa muchanan di scolnan secundario pa conscientisa nan tocante peligernan, consecuencianan y kico mester tene na cuenta cune pa temporada di Carnaval.

El a informa cu desde luna di november nan a cuminsa crea e mesun ekipo di aña pasa y nan a manda un invitacion pa tur scol secundario na Aruba, caminda cu nan a haya un bon reaccion di parti di scolnan pa asina nan lo haya charlanan di diferente topico cu e diferente fundacion.

Arthur Comenencia di Consultorio pa Asuntonan di Adiccion a splica cu loke nan ta bay splica den Carrousel 2020 ta e topico di videogaming y gaming adiccion, cu den ultimo tempo a causa hopi impacto den comunidad y mirando cu den temporada di Carnaval algun mayornan ta laga muchanan su so den cas pa nan por asisti pa e diferente parada.

Tambe el a declara cu nan union ta hopi importante pa duna informacion corecto pa hobennan pa nan sa kico ta e peligernan di gaming adiccion.

Monic Giel di Wit Gele Kruis Aruba a expresa cu nan parti den Carrousel, aki ta unda cu nan lo presenta e topico di embaraso hubenil y el a enfatisa tambe riba con ta ora un mucha muhe ta bira un mama y e consecuencianan cu esey por trece, con e bida di un mama hoben ta y cu algun biaha esey no ta resulta facil.

Giel a comenta cu loke ta trata e charla y forma di couching cu nan ta ofrece nan scol ta dunando resultado, pa motibo cu nan a ripara cu e cifranan di embaraso hubenil a baha, na aña 2019 e cifra tabata abou di 100 hoben cu a haya yiu.

Giovanny Nicolaas di departamento di Aduana a bisa cu pa via di FADA nan t’ey pa conscientisa e hobennan cu droga ta malo pa nan bida y pa nan salud, asina mes Nicolaas a trece dilanti cu den e charlanan nan tambe ta splica e hobennan kico nan ta haci den nan tarea diario y cu nan ta zorg pa e droganan no drenta na e pais.

Den e charlanan na scol, e tarea di nan ta primeramente pa dos persona di departamento di Aduana ta pa presenta nan topico mas importante di Aduana y mustra e muchanan con e cacho di departamento ta traha.

Ademas, Rulienne Arends a duna di conoce cu tambe lo ta presente den Carrousel 2020 Servicio pa Combati Malesanan Infeccioso (DBZ) y Telefon pa Hubentud cu e aña aki tin diferente tema mirando cu scolnan a haci peticion pa temanan hopi specifico cu nan ta haya den nan mes scol.

Pa finalisa, Arends a declara cu nan a ripara cu tin diferente reto cu semper ta hunga un rol ora cu nan ta papia di diferente topico, por ehempel alcohol of droga, tambe tin un tema nobo cu nan ta papia hopi di dje cu ta adiccion na video gaming y semper ta existi factor cu ta pone cu e hobennan ta cuminsa duda, un di nan ta social media, pero ta keda cu no hopi informacion cu nan mes ta investiga ta corecto.

Di mesun manera, nan ta keda remarca cu tur tipo di adiccion por trece consecuencianan grave, pero tampoco nan ta papia cosnan negativo, tambe algun di nan tin cosnan positivo.

Esaki ta topiconan cu semper nan tin presenta durante henter aña y nan como fundacion mester adapta nan mes den esey pa wak di ki forma nan ta duna nan presentacionnan y e ultimo tempo e ta bayendo hopi bon, e hobennan ta reaccion di forma positivo cu e informacion cu nan ta ofrece den scolnan.