Lider di Hong Kong, Carrie Lam, a bisa cu nunca a presenta su renuncia pa China en conexion cu protesta antigubernamental cu ta sacudi e ciudad durante e ultimo 3 luna.
“Nunca mi a presenta mi renuncia na gobierno di pueblo central. Ni pensa pa discuti un renuncia. E eleccion di no renuncia tabata decision di mi. No ta bay ta un caminda facil y pa e motibo aki, mi no a duna mi mes opcion di caminda facil pa bay”, Lam a bisa ora nan a puntr’e dicon Beijing a nenga pa lag’e retira.
Lam tambe a critica grabacion y filtracion di su comentario di un reunion priva anterior como ‘inaceptabel’. E tabata scogi como director ehecutivo di Hong Kong pa e comite ‘pro- Beijing’ di elite di Hong Kong y gobierno continental cu ta duna sosten na gobierno y forsa policial.
For di juni, manifestante ta yena parke y caminda pa exigi reforma democratico pa e gobierno di Hong Kong y un investigacion independiente di accion policial contra manifestante.
Lam ta obheto di critica pa impulso di proyecto di ley di extradicion, cu lo permiti residente di Hong Kong wordo manda pa China continental pa huicio, pero e manifestantenan kier retiro completo di Lam.
Confrontacion entre polis y manifestante a bira mas violento, cu ambos partido ta defende nan propio posicion. Mas di 1.100 di persona a wordo deteni. Lam a bisa cu lo mantene e forma di ‘un pais, dos sistema’ segun tabata e ley bieu di colonia Britanico na 1997.
Lam a bisa cu e no sa cuanto tempo lo tuma pa caba cu ‘desobediencia civil’ pero ta sigui confiando pa restaura e ley y orden. E manifestantenan, mayoria hoben, ta bisa cu ta necesario un grado di violencia pa hala atencion di gobierno despues cu manifestacion pacifico tabata inutil.
Administracion di Lam ta bisa cu violencia mester caba prome cu nan por cuminsa cualkier dialogo.
