Dialuna mainta Minister di Turismo, Salubridad Publico y Deporte, Dangui Oduber, hunto cu director di Aruba Ports Authority (APA), meneer Marc Figaroa, a tene un conferencia di prensa den cuadro di recuperacion di turismo y economia di Aruba caminda nan a elabora ariba e yegada di cruceronan back na Aruba.

Desde comienso di aña APA, conhuntamente cu ministerio di turismo y departamento di salud publico tabata den negociacionnan cu varios liña di crucero pa asina por yega na un acuerdo pa cruceronan cuminsa yega back na Aruba.

“Dia 9 di juni Aruba a ricibi su prome barco crucero desde cu e pandemia a cuminsa 13 di maart di aña 2020. Sigur tabata un momento di hopi alegria y felicidad pa Aruba ricibi e prome liña di crucero cu tabata Celebrity Cruise”, Minister Oduber a bisa. “Despues di esaki negociacionnan a sigui cu varios otro cruise lines, entre otro Carnival Cruise Line cu tambe ta un di e cruceronan cu ta trece hopi turista pa Aruba, y den e ultimo simannan nos a logra concretisa e protocolnan cu awe nos por anuncia cu 13 di juli Aruba ta bay ricibi e prome barco crucero di Carnival Cruise Line”.

E barco crucero, Carnival Horizon, lo ta treciendo 2800 turista, cual ta un poco mas cu mita di e capacidad completo (4500 turista) cu e barco crucero aki tin.

Pa loke ta trata yegadanan di barconan crucero pa e resto di aña Minister Oduber ta bisa: “lo ta bay tin 24 call e aña aki di Carnival Horizon y ta premira cu lo bay ricibi 69 call total pa aña 2021, nos ta hopi contento y agradecido cu nos por a logra convence e dos liñanan di crucero aki, cu ta Royal Caribbean cu tin e liña di Celebrity, y tambe Carnival Cruise Line”.

Minister Oduber ta sigura cu e yegada di cruceronan back na Aruba lo tin un impacto positivo pa turismo, pa APA, pa e taxistanan y tambe pa e restauracion di economia di Aruba. “Momentonan sigur positivo pa APA, sigur pa pais Aruba, cu lo bay genera cuponan di trabou, lo bay crea entrada pa gobierno, lo stimula economia”.

Director di APA, meneer Marc Figaroa, a elabora un poco ariba e protocolnan cu tin vigente na momento di e yegada di Carnival Horizon.

“Carnival ta prome crucero cu lo ta saliendo for di Port of Miami y esey tambe ta bin cu tur e reglanan di Florida, pero tambe pa tene na esakinan di Aruba”, Figaroa a bisa. “E liña di crucero ta bin cu mas di 95% di guestnan vacuna, crew ta 100% vacuna. E porcentahe chikito cu no ta vacuna ta bay opera den un bubble, nan no por beneficia di full e operacion, dus nan ta limita”.

Pa locual ta trata protocolnan ariba tereno di APA, meneer Figaroa ta bisa cu; “e medidanan ta in place ainda, e uso di mask y tur eseynan ta in place na e momentonan aki ainda”.

Bon Dia Aruba a haci e pregunta na Minister Oduber, mirando cu tin 3000 UTV na Aruba ta core rond causando daño na nos naturalesa y hopi accident, y e yegada di mas turista crucero ta eleva e posibilidad di mas UTV riba caminda diariamente, kico ta medidanan cu ta tumando pa reduci e dañonan causa pa e vehiculonan aki y si esaki ta nifica turismo sostenibel pa Aruba.

“Mi ta kere e discusion ki a wordo hiba pa hopi aña, kico ta bo capacidad di carga, cuanto vergunning di UTV bo por duna, kico ta e daño na bo naturalesa, kico ta e daño na bo medio ambiente, con sostenibel esaki ta pa bo turismo on long term”, Minister Oduber a bisa.

“Moving Forward, di aña 2021 bai dilanti, nos ta tene cuenta cu e estudio cu a wordo haci di Carrying Capacity di ATA pa cantidad di turista crucero cu nos por afford, paso manera bo sa ora tin turista crucero e ta pone un peso adicional riba henter bo infrastructura, kinan bo ta mira e camindanan con nan ta congestiona, bo tin hopi mas UTV cu por causa daño na bo naturalesa, ta pesey nos ta tene bon cuenta cu esaki, cu nos kier un desaroyo cu ta sostenibel den tur sentido di palabra”, el a bisa.

Comision Flora y Fauna a duna diferente conseho pa locual ta trata e uso di UTV na nos isla y Minister Oduber ta bisa; “si ta pa nan, nan no lo desea mes di tin UTV, pero nos tin cu tene cuenta si cu nos tin cu keda ofrece e tipo di actividadnan controla, regula, na nos turistanan. Tur conseho nos ta tene cuenta cu nan, naturalmente bo no por sigui tur e consehonan 100%, den e caso aki ta bira dificil paso na final di dia tin hopi compania cu ta ofrece e servicio aki na turistanan, tin hopi hende na Aruba ta depende directamente nan entrada di e tipo di actividadnan aki, kiermen nos ta tene cuenta cu conseho y nos lo considera nan tambe sigur partners den e desaroyo sostenibel cu nos ta papiando di dje pa nos futuro moving forward”.