ORANJESTAD – Carnaval ta e temporada cu Arubianonan ta warda den tur e aña pa disfruta, gosa y algun di nan, ta prepara nan paña pa bay den cualkier grupo pa asina experiencia e Carnaval mas miho.

Bon Dia Aruba a entrevista Roberto Brown, miho conoci como ‘Boedoem’ ken ta un carnavalista cu a dedica 47 aña na nos Carnaval. El a splica cu el a cuminsa asisti na Carnaval ora e tabatin 3 aña, despues el a bay cu Colegio Arubano y tambe a participa den brassband. El a duna di conoce cu e tin hopi trayectoria den Carnaval, como participante di diferente actividad y a gana hopi premio cu su seccion.

Na aña 1993, el a bay den su prome parada cu un seccion na Santo Domingo, Republica Dominicana. Na aña 1995 e tabatin e curashi pa asisti na e carnaval di e aña ey cu su prome seccion. Tambe a conta cu e y su ekipo, tabata bay New York pa cumpra tur cosnan exclusivo y asina ofrece den su seccion e miho trahe di Carnaval. “Nos a cuminsa trece pa e Carnaval di Aruba, e telanan exclusivo”, Brown a expresa.

Carlos Tromp y Brown tur aña ta traha riba nan mesun seccion pa Carnaval. E grupo ta conforma pa aproximadamente 5 persona cu tin e pasenshi di traha tur cos cu nan propio man, tambe nan a comenta cu “nos ta focus riba nos teamwork; nos sa di cada hende kico nan lo por traha y kico nan talento ta pa contribui cu nos seccion.”

Carlos Tromp, un Carnavalista cu a drenta den mundo ey na aña 1985, a splica cu, for di e tempo ey na scol, tabata siña tur studiantenan pa traha cosnan cu nan man; awo esey no ta mas. “Un hoben di e tempo aki no sa con e lo por traha cu su man. Bo por wak cu e generacion aki ta puro riba telefon, computer, iPad; nan no a wordo educa pa haci e cosnan aki.” Tromp ta declara. Durante e entrevista nan a splica cu e “handenarbeid” a bay atras. Brown a bisa cu e por cose pa motibo cu el a siña esey na scol. Nan a siña nan pa traha cu macrame, cabuya, cuero, tur e cosnan ey.

Tromp y Brown a duna di conoce cu Carnaval di antes, compara cu esun di e tempo, aki tin e diferencia cu a bira algo “hopi comercial.” E hende tabata mas colaborado, “tur persona tabata yuda otro, awo esey no ta pasa mas”.

Brown a comenta cu, den proximo añanan Carnaval lo por tin un problema hopi serio, pa motibo cu e tradicionnan lo por disparce. “Un cos cu lo por pasa ta cu hende lo por bay Brasil of Trinidad y nan lo por trece tur e pañanan cla, sin cu nan mester pone nada riba dje.” Di e tema ey nan a comenta cu “hende no por compara con nos cu ta sinta plak tur cos, cu un persona cu ta bestel su cos ‘kant-en-klaar’ anto kier drecha.” Carlos Tromp a sigura cu den futuro no lo haya seccion di Carnaval mas; “nos ta perdiendo e toke cultural, Carnaval lo bira mas masa y menos seccion.”

Tromp ta bisa cu e aña aki ta e ultimo cu e lo participa cu su seccion, pa motibonan cu “ami ta birando grandi; nos no por traha mas te oranan di marduga y bay traha e otro dia; nos a yega na un fase cu nos mester lag’e bay pa duna otro un chens”.

Tambe a expresa cu e importancia di e aña aki Carnaval 65 ta pa motibo cu ta un aniversario, semper cu e Carnaval ta aniversario ta haci un influencia riba hendenan; mas hende kier bay aden y loke ta haci mas importante ta e nivel di Carnaval ta subi, “bo ta bay haya un Carnaval mas bunita, hopi mas luhoso”, asina Tromp a expresa.

Un problema cu Carnaval di awo tin ta e politica, “Carnaval mester keda un celebracion di pueblo, no pa un color di un partido politico,” Carlos Tromp a comenta. Di e mesun manera el a bisa cu, segun su opinion, “hendenan tin pensamento robes; nan ta kere door cu nos ta e ultimo, cu nos ta cera e periodo di Carnaval cu parada grandi, den e ora cu nos a participa cu nos gana no tin presupuesto mas, esey ta un cos cu ta pone nos rabia; nan no ta balora nos trabou”.

Di otro banda Brown a expresa cu “mi no kier pa hende comprondemi malo pa motibo cu mi no tin nada contra Reina, pero Reina a haya tur sorto di atencion, regalo, pero e carnavalista cu ta haci un parada bunita pa e mirones, no ta haya nada.”

Pa finalisa, Tromp a bisa cu “nos mester stop di haci cu tur cos ta placa. Mi sa cu ta algo dificil pa un hende bay aden, pero no tin hopi hende cu ta haci e trabou boluntario manera cu nos ta haci. A yega tempo pa nos cuminsa pensa pa sigui engrandece nos cultura di Carnaval”.

.