(Infobae) – E fiestanan di carnaval, cu ta paralisa Brazil durante cinco dia y tin su epicentro na Rio de Janeiro, a bin bek ayera diabierna pa un edicion cu mester a pone baila casi 46 miyon hende na henter e pais, incluyendo turistanan stranhero cu un mobilisacion di 1.558 miyon dollar.
E cifranan di Ministerio di Turismo ta spera numbernan record e fin di siman aki despues cu e fiestanan di 2021 a wordo cancela pa pandemia di Covid-19 y 2022 a wordo limita na un number chikito di ciudadnan igualmente pa restriccionnan sanitario y den cual no a wordo permiti e paradanan riba caya cu ta duna bida y alma na e carnaval lo a tuma luga.
Di acuerdo cu proyeccion di Confederacion Nacional di Comercio (CNC) cita pa e Ministerio, e entrada genera pa carnaval na henter Brazil ta bay yega na 1.558 miyon dollar, un balor superior cu aña 2022 di 26,9% y cu si lo wordo cumpli, ta e di dos cifra mayor den ultimo 11 aña supera solamente pa esun di 2020 cu 1.629 miyon dollar prome cu pandemia.
Poco mas di e mita di e entrada ey ta bay keda pa Rio de Janeiro, cu 870 miyon dollar ya cu su fiestanan ta entre esun di mas famoso na mundo y den cual mas turistanan Brasileño y stranhero ta bishita tur aña.
E desfile di diesdos ‘escolas’ di samba di e yama Grupo Special, un especie di prome categoria entre e casi 100 cu ta bay wordo presenta e aña aki, ta wordo considera como e espectaculo di mas grandi den aire liber na mundo y e atraccion principal di e carnaval di Brazil.
Cada un di e agrupacion tin 3.500 integrante entre musiconan, bailarin y figuranan destaca cu carosa grandi, cu ta desfila den e 700 meter di e Sambodromo pa e 74.000 persona asistente cu ya caba a bende tur entrada pa diadomingo y dialuna.
Di acuerdo cu Ministerio di Turismo, casi 5 miyon persona ta bay baila na ritmo di 400 bloco cu ta bay desfila na Rio de Janeiro e aña aki, un cifra tres biaha menos cu esun cu ta bay disfruta Sao Paulo (15 miyon) aunke den e ciudad mayor di Brazil e mayoria di fiestanan ta local.
