Bida ta sigui…
Manera den caso di tur bon fiesta, e preparacionnan ta dura mas largo cu su culminacion mes. Esaki ta e sentimento sigur despues di e ultimo dos dianan, cu ta marca fin di e fiesta mas grandi y mas popular. Esaki no pa nos so, sino pa practicamente tur pais cu un poblacion catolico grandi.
En todo caso, por bisa cu e placer en berdad no ta den e celebracion so, sino mas cu tur cos den e lunanan di preparacion y evento intermedio. Tambe carnaval ta sirbi como un vacacion bon mereci, unda nos por pone tur e problemanan di nos mes y di nos pais, un banda pa celebra un fiesta bon mereci, cu hopi musica y baile. Durante algun dia nos no ta papia problema financiero, ni di gobierno ni di nos mes; tur asunto di servicio medico, asunto social, enseñansa, matrimonio pa pareha di igual sexo, fila na Servicio di Impuesto si of no, tardansa den tramitacion di tur tipo di permiso, trafico cu ta pega tur caminda, specialmente unda ingenieronan a lubida cu awa sa yobe, y awa cu no tin salida ta acumula y causa problema.
Menos mal cu den e ultimo caso aki, a yega na un solucion hopi bon: a anuncia cu a manda busca un ingeniero na Hulanda, pa yuda resolve e problema di rotonde na Cumana. Kico miho en berdad cu busca hende cu pa nan experticio a wordo busca pa resolve problema grandi na New Orleans, despues di horcan Katrina. Of na Inglatera despues di e inundacion grandi un par di aña pasa. Un experto asina mester por bisa nos ta unda e salida pa e awa eynan mester bin… Pero, ata nos ta ataca atrobe e asuntonan cu lo mester a keda benta te awe, o preferiblemente, mañan. Ban bolbe pa e cosnan positivo cu a nota den carnaval. Sin ningun duda por bisa cu Aruba su carnaval tabata luci tremendo, hopi colorido, hopi entusiasmo y di un magnitud cu a surpasa esun di aña pasa, por lo menos, esey tabata nos impresion. E cantidad di trabao cu ta bay den e esfuerso aki ta inmenso, y e resultado tabata corespondiente. Sinembargo, ta keda e cosnan cu por drecha.
Por ehemplo, e presencia di un gran cantidad di truck den e parada, cu ta causa manera un kiebra den e parada, cada biaha cu un grupo den tur su splendor y color caba di pasa. Na e momentonan ey hopi biaha ta haci falta e musica acompañante, loke cierto fanaticonan ta resolve habriendo nan mes sound system pa mantene e ambiente. Tambe e falta di adorno riba e vehiculonan aki ta haci e totalidad di e parada menos di loke e por ta. Pa esunnan cu ta encanta cu carnaval di tur manera, e pensamentonan aki lo no ta al caso, pero si manera semper mester busca pa mehora e evento, anto talbes aki ta unda por haci algo. Comercio tambe semper ta coopera na diferente manera cu carnaval, y esey no tin pakico di cambia. Kisas lo ta bon si conhuntamente cu comercio analisa si por traha hunto riba e aspecto di cambia e aspecto di e vehiculonan di tal manera cu e sponsor tambe ta beneficia. Sinembargo, nos no por a keda sin nota e presencia di propaganda di un casino, cu ta un invitacion directo na e poblacion pa participa mas den wega di placa.
Nan argumento lo ta cu gobierno(nan) mes ta organisa wega di placa, anto kico ta e problema pa un casino, cu ta un negoshi legal, haci propaganda tambe. Ademas cu nan tin añanan ta haci propaganda bao di e poblacion local caba, y por considera esaki parti di e negoshi.
Esey ta berdad, pero e interogante cu ta surgi ta, pakico nos tin controlado ainda anto na entrada di cada casino, dentro di e filosofia oficial cu no ta bon pa nos poblacion bin demasiado facil den contacto cu wega di placa, pa evita adiccion na esaki. Nos experiencia personal ta cu na entrada di cualkier casino den ultimo añanan, nunca a mira algo di control mes. Si e pensamento gubernamental ta cu no mester di e control aki mas tampoco, cu el a bira obsoleto, laga nos actua consecuentemente anto. Tin algo mas cu ta capta nos atencion tur aña durante e celebracion di tur e paradanan, unda cu ta.
Esey ta cu ora e parada caba, ta bin un otro parada…. Esun di e trucknan cu ta bin recoge e baricadanan, y ta recoge sushi y ta laga e luga asina, cu ta facil pa kere cu e aña aki no tabatin carnaval mes. Ta e trailernan na banda so ta keda como testigo ainda. Un organisacion cu ta move manera un mashin bon zeta, ta un placer pa observa. E ta proba cu nos por ta ordena, disciplina y bon organisa masha bon, si nos kier. Ora nos no ta hacie, ta pasobra e boluntad no t’ey.
Ohala algo di e demostracion di trabao coordina y ordena aki por pasa manera un virus benevolente riba otro servicionan gubernamental, cu no ta orienta riba haci e trabao pa cual nan ta yama.
