Periodo di Carnaval ta tras di lomba un biaha mas y asina tambe un temporada druk pa cuerpo policial ta tras di lomba. Un temporada carnavalesco unda cu e cantidad di detencionnan y multa ta mustra di a baha, cada parada compara cu aña pasa. Segun Vocero suplente di cuerpo di polis Liliana Rasmijn, “si pone atencion na e causanan di detencion, ta mira cu e por a bay miho.”
Detayenan di e cantidad di detencion di Parada Grandi cu a tuma luga diasabra na San Nicolas ta 23 detencion y 3200 florin cobra na boet. Aña pasa tabatin 30 detencion cu 8300 florin cobra na boet. E parada a sali net 1or di merdia manera programa y last lap a drenta 7:45 anochi mientras cu e orario planifica tabata pa 7or. E motibonan di detencionan ta pa buracheria, bringamento, no sigui ordo di polis, insulta un agente policial y tambe pa a haya persona cu arma blanco (sker).
Pa loke ta e orario cu e parada a caba, Polis a bisa di no ta bay den e dilemma ey y ta laga esey den man di SMAC pa reacciona, pero ta kere cu tabatin mal calculacion di ora, pa SMAC. Ta di remarca cu locual cu ta guiamento di e tempo di parada ta den man di SMAC y no di polis, segun vocero di polis Lito Lacle.
Pa loke ta e Parada Grandi na Oranjestad Sra. Rasmijn a bisa cu a haci 25 detencion cu ta suma 7700 florin na boet. Aña pasa 32 detencion cu 12250 florin na boet. E parada a sali net 1or di merdia na Oranjestad tambe y caba mas o menos 7or y 35 di anochi.
