ORANJESTAD – den e conferencia di prensa di gobierno diahuebs mainta, Señora Carmen Herrera a amplia riba e realisacion di e metodo di conscientisacion di abuso di menor pa scolnan.
Herrera ta activo caba desde 1993 den diferente proyecto di conscientisacion. El a produci un obra teatral specifico pa kibra e tabu rond di abuso sexual di menornan, y a presenta esaki na scolnan. E produccion aki ta enfoca riba con pa yuda e mucha di scol preveni posibel abuso riba un manera educativo musicalmente. Tambe, for di e obra teatral aki, Herrera a traha un buki, cantica y leesplaatjes cu ta disponibel na tur scol publico. Maestronan por yuda e alumnonan ‘Bisa no! Core bay y keh’e’ via e programa aki.
E meta no ta pa spanta e mucha, Herrera a splica, pasobra ‘tin hopi mas hende bon cu hende malo’. Y e ta sumamente necesario pa duna e muchanan e hermentnan pa nan por evita y preveni di bira victimanan di abuso. E metodo ta consisti di diferente les basa riba e obra teatral y e canticanan. Tur esaki ta un formula pa conscientisa nos menornan pa cu e realidad peligroso cu tur e pedofilnan riba Aruba.
Minister di enseñansa, Rudy Lampe, a expresa di ta sostene e metodo di conscientisacion di abuso di menor na scolnan cu ta siña nos muchanan for di un edad tempran cu tin peligernan eyfo, y con pa ‘Bisa no! Core bay y keh’e’.
