Legalisa piscamento cu harpun unicamente lo contribui na degradacion mas grandi ainda di comunidadnan di rif. Esaki ta un di e conclusionnan di e investigacion cu CARMABI a haci riba calidad di rif pa Aruba.

Ta un estudio cu Gobierno tabatin den su poder caba na 2020, y asina mes, ex Minister Cris Romero y ex Minister Andin Bikker a pusha pa un maneho di tolerancia pa permiti piscamento cu harpun. Cu excepcion di ex Parlamentario Daphne Lejuez, tur Parlamentario e tempo ey a bay de acuerdo cu e maneho di tolerancia, contra tur conseho di expertonan local, algun di nan cu tabatin e rapport den nan posicion y otro no. Es mas, e Minister di Medio Ambiente e tempo ey, Marisol Lopez Tromp, kende a bisa di no tabata na altura di e contenido di e rapport, no tabata kier un maneho di tolerancia pa piscamento cu harpun sin mas, pero tur Parlamentario, cu excepcion di uno, a pone su obhecionnan un banda.

Pero awor ta resulta cu CARMABI a adverti contra piscamento cu harpun.

Comunidadnan di pisca ta bao presion di sobrepesca y legalisa piscamento di harpun lo empeora esaki. E investigacion di CARMABI a indica cu casi tur especie ta bao presion pa motibo di sobrepesca y pisca grandi ya ta incomun den e awanan costal di Aruba. E especienanan grandi cu ta ecologicamente y comercialmente importante, manera giampou y gutu, ta cuminza reproduci ora cu nan ta entre 15 pa 20 centimeter. E hecho cu e cantidad di pisca grandi di e tiponan aki ta poco ta nifica cu eventualmente lo tin menos pisca den futuro, y cu unicamente lo bira pio cu di mas piscamento. Mas ainda, e destruccion di comunidadnan di rif pa motibo di tiramento di anker ta empeora e efectonan negativo di piscamento. Segun e ley di Pesca di Aruba, AB 1992, no, 116, e practica di piscamento legal ta unicamente permiti tanten cu e poblacion y sobrevivencia di e especienan no ta impacta na nivelnan peligroso. E consideracion pa permiti piscamento cu harpun como tal ta prematuro mirando e señalnan fuerte di sobrepesca. Aruba tabatin e vision den pasado pa ta e prome den region pa proteha e gutu, cu a yuda e condicion di e comunidadnan di rif. E ta consehabel pa Aruba sigui cu e proteccion aki y tuma accion progresivo pa proteha, enbes di pisca locual a keda di e poblacionnan di pisca di rif. E evaluacion di cantidad y analisis di e cantidad di pisca captura ta necesario pa identifica cua ta e tipo di pisca di profundidad cu por pisca di forma sostenibel y determina si ora mester stop di pisca pa evita collapse di poblacion.

Edgard Vrolijk ainda ta sostene ‘gedoogbeleid’

Bon Dia Aruba a tuma contact cu mr. Edgard Vrolijk, Presidente actual di Parlamento riba su pensamento encuanto e maneho di tolerancia cu a instrui Gobierno pa tuma y permiti piscamento cu harpun. Segun mr. Vrolijk, a pesar di e rapport di CARMABI, e ta keda para tras di su decision. El a invita Bon Dia Aruba pa ta presente na momento cu piscadonan ta usa e harpun den e parti Noord di Aruba. “Mi ta kere den dje (maneho di tolerancia) ainda. Mi ta kere den regulacion di periodo di usa esaki y cua zona pa haci esaki,” mr. Vrolijk a bisa. Riba e pregunta si e ta kere cu tin control tumando luga riba piscamento cu harpun, Presidente di Parlamento, mr Vrolijk a bisa cu “mi tambe ta para pa control y zonificacion y tira pisca cu ta duna espacio pa zonanan afecta por recupera.” Mr. Vrolijk a bisa cu e forma con ta tira Lionfish tambe ta peligroso pa e sistema di rif, pero e pisca tambe ta destructivo pa otro especie di pisca. “Kustwacht y maritieme politie ta dos instancia respeta y ta hiba bon control. Y sigur desde cu a aplica e gedoogbeleid y a cuminza regula, ta mira con mas consciente e tiramento a bira compara cu prome.” Di otro banda, mr. Vrolijk a agrega cu ainda falta control riba piscamento cu palandra den awanan teritorial di Aruba. E ta un practica cu ta destrui hopi mes y ainda ta sosode regularmente. “Hopi cos tin di regula y asina por sigui menciona mas cosnan iregular, entre otro cu botonan turistico y local pa placer, cu ta dañando hopi,” Presidente di Parlamento a conclui.