(CuraçaoChronicle) – Carmabi no ta contra e desaroyo a gran escala di Oostpunt, pero ta kere cu decisionnan tocante un area cu ta cubri 10 porciento di e isla mester wordo haci cautelosamente. Esaki ta pa loke e fundacion di naturalesa y medio ambiente a apela e siman aki.

Carmabi ta involucra den un demanda contra gobierno di Corsou desde 2017 pa e desaroyo a gran escala na Oostpunt. Corte a duna veredicto dia 1 di december ultimo cu e ordenansa nacional cu ta permiti desaroyo di e area ta bay continua existiendo den su forma actual.

Durante ultimo cinco aña, e demanda aki a causa gran confusion, segun e fundacion cu ta maneha, entre otro, e parkenan nacional Shete Boka y Christoffel. Por ehemplo, Carmabi a keda acusa di kier desaroya Oostpunt su mes, di kier construi un aeropuerto, di ta contra cualkier forma di desaroyo na Oostpunt, of hasta contra e desaroyo economico di e isla en general. “Sinembargo, Carmbai no tin ambicion en absoluto pa kier desaroya Oostpunt su mes, sino solamente ta kere cu e grado na cual por desaroya Oostpunt mester keda determina a base di informacion corecto y proceduranan (legal) cauteloso”, segun Carmabi a bisa den un comunicado di prensa.

Proteccion di naturalesa unico
E disputa legal entre Carmabi y gobierno di Corsou ta draai rond di e Ordenansa Nacional di Revision Oostpunt, cual a keda adopta na inicio di 2017. Segun Carmabi, e Ordenansa Nacional aki a bin sin substanciacion adecua. E fundacion e ora a dicidi di bay corte pa forsa un reconsideracion di e plannan pa Oostpunt basa riba e informacion existente tocante e area y resto di e isla. Esaki ta preveni construccionnan di determina e apariencia di henter e area, manera awo ta posible bao di e Ordenansa Nacional nobo. Tambe ta preveni diversidad natural unico y e presencia di ecosistemanan unico di Corsou di bay perdi.

Plan alternativo
 Carmabi pa e motibo aki durante varios aña a propone un principio alternativo pa e desaroyo di Oostpunt, den cual aproximadamente trinta porciento di e parti mas oriental di area di Oostpunt ta estableci como un area grandi continuo di conservacion.

Di e forma aki, Corsou tambe lo cumpli cu e minimo ampliamente usa internacionalmente di trinta porciento di e superficie di un area cu mester ta disponible pa conservacion di naturalesa. E area tambe a keda scogi di manera cu e rifnan di coral na e costa por scapa di e varios forma di contaminacion.

Carmabi: “Decisionnan tocante desaroyo dentro di reservanan natural cu ta bay tin consecuencianan adverso pa ambiente natural di e isla pa e motibo ey mester wordo considera pa asina preveni erornan y consecuencianan ireversible di desaroyo lo mas posible. Tanten cu esaki no ta e caso, Carmabi ta bay haya su mes obliga di purba di forsa un consideracion asina mediante corte.”

Riba potret: Concepto di e propuesta di Carmabi pa designa un parti di area di Oostpunt como area di conservacion. E areanan riba tera cu ta core den e area entre Hamrak y Punt Kanon lo ta liber di construccion pa asina protege e rifnan na e costa en particular.