Diasabra anochi a tuma luga e lansamento di candidato Carlos Bermudez cu ta subi lista di AVP. E evento tabata na Boegoeroei.
Esaki ta informacion for di un relato di e partido:
Den su introduccion sr. Bermudez a manifesta su determinacion pa traha na bienestar di Aruba, en particular riba e aspecto di telecomunicacion y informatica cu ta su specialidad. E candidato a papia di con despues cu gobierno a percura durante ultimo ocho aña pa Aruba tin un infrastructura di nivel halto, ta yega momento pa traha riba e infrastructural digital cu por haci di nos isla un pais cu ta ‘smart’ tambe.
“E bon trabou ta sigui shonnan,” asina e candidato nobo a cuminsa bisando. “Banda di tur e infrastructura cu pueblo ta mira cu ta wordo mehora, e momento a yega pa nos crea un infrastructura nobo, pero digital. E infrastructural digital aki mester tin un rol esencial den tur departamento di gobierno y den tur ministerio cu duna asistencia na e trabounan di husticia, salubridad publico, pa yuda enseñansa; djis pa nombra algun.”
Ing. Carlos Bermudez ta e menor di 7 ruman homber, yiunan di Dominico ‘Do’ Bermudez y Theodora ‘Doja’ Bermudez-Tromp. Na 1989 sr. Bermudez a bay studia na Eindhoven, Hulanda caminda el a logra su prome titulo di Ingeniero den e ramo di Telecomunicacion. El a sigui studia den e ramo di ciencia di computer, logrando un di dos titulo como ingeniero den Telematica. Pa 7 aña el a traha pa diferente companianan multinacional, manera Philips. Na 2002 el a regresa Aruba despues cu a haci un apelacion na su persona pa guia e Departamento di Automatisacion di Gobierno di Aruba y tin seis aña caba como director.
