Fundacion Educador Consciente a cuminsa su actividadnan november ultimo y ta dedica pa promove full e programa di ‘Disciplina Consciente’, dirigi pa mayornan y docentenan specialmente.
Carla Briezen di Fundacion Educacion Consciente a duna di conoce cu e programa a bin for di Merca, crea pa Dr. Becky Bailey pa trece aspecto di desaroyo social emocional di un manera saludabel pa e muchanan.
Desde 2018, el a comenta cu tin instructor Helen Guda, ken ta un instructor certifica di Disciplina Consciente na Aruba, kende a lanta Develop to Grow. E ora ey Briezen hunto cu dos colega a join den e grupo aki como boluntario.
Nan ta un grupo enfoca riba tayer pa mayornan y docentenan di scol na unda nan ta siña con e muchanan por regula y maneha nan emocion, pa nan por tuma decisionnan cu ta bon pa nan y cu ta tene nan y esunnan rond di nan mas sigur.
Di e manera aki, Briezen a expresa cu e programa aki tambe ta propone cu cada mucha of individuo mester para responsabel pa su propio comportamento. Nan ta basa riba investigacion recien pa cu celebro y ta invita e docentenan pa compronde prome nan mesun pensamento y emocion, pa despues nan yuda e muchanan pa haci mes cos.
E fundacion a ser crea pa traha manera un ‘consultant’ como trabou boluntario y haya fondo pa logra tur meta cu nan tin. Su mision ta contribui na un desaroyo social emocional saludabel di muchanan, ofreciendo un conocemento y practica di e programa Disciplina Consciente na tur mayor, educador, comunidad den general y profesionalnan di e programa. Asina den futuro tin mas adulto cu por anda miho cu emocion y conflicto.
Briezen a señala cu loke nan kier logra ta haci un centro di conocemento profesional cu fondo pa promove un aplicacion di e programa aki, cu ta sirbi pa tur hende segun e principionan y conocemento cientifico mas recien, pa asina logra educadornan mas consciente cu ta guia e muchanan den nan cuido na un forma efectivo pa desaroyo social emocional optimal.
E parti fuerte di e programa, Briezen a splica cu ta inteligencia emocional. Algun investigacion ta demostra cu e inteligencia emocional ta hasta mas importante cu e mesun inteligencia como intelectual, pa motibo cu si un persona no tin habilidad pa maneha su emocion di un manera efectivo y regula su mes, esaki ta bay keda stroba den e funcionamento.
Tambe tin e parti social, emocional cu tambe ta demostra ora un mucha ta sinti insigur. Na e momento ey e tin acceso na e partinan mas halto di su celebro cu ta e parti mas sabio. Academicamente tambe por mira den scolnan aworaki cu ta implementa e programa aki di un manera consecuente y e parti academico tambe ta eleva. Tocante esaki, Brizen a sigura cu por haya mas mucha mas sabi cu por resolve problemanan di un manera mas sabio.
Asina mes, el a duna di conoce cu si algun scol tin interes, pa acerca nan y haci un peticion, nan ta haci un trayecto di e manera con ta bay implementa e programa.
Briezen a informa cu diamars awor, dia 25 di februari nan tin e prome tayer ‘Keep your cool’. Lo purba di haci esaki un bes pa luna. Ademas, el a menciona cu den e grupo di boluntario tambe tin interes di bira trainer pa asina den futuro en fundacion lo por ofrece cu mas frecuencia tayernan di nivel mas halto.
‘Keep your cool’ manera el a bisa ta invita mayornan pa keda trankil. Disciplina Consciente ta consisti di varios habilidad cu tin como base e compostura, esey na nifica cu durante momentonan tenso of di conflicto, mayor of docentenan por keda trankil pa keda presente di loke ta nan dilanti y wak e comportamento di e mucha.
Si por ehempel, si e mucha ta mal comporta e ta falta di un habilidad, papia cune pa e por expresa kico ta su molestia y yuda e pa siña tecnica di relahacion y hala rosea. Den principio, e muchanan ta imita e tecnica aki cu otro mucha, tanten den su pensamento por regula nan emocion y comportacion, contacto visual y fisico, rutina y comunicacion ta elementonan clave pa haya esaki.
