Hendrik ‘Endy’ Croes y Carl Quant no ta hendenan desconoci na Aruba. Endy tabata ‘anchor’ pa Telenoticia y despues a bira e vocero di aeropuerto, y Carl tabata traha cu Fundacion Parke Nacional Aruba. Y ambos semper tabata hopi habri cu nan relacion amoroso pa otro y a laga comunidad di Aruba conoce nan como pareha sin haci mucho fanfaria. Es mas, e forma organico a permiti e pareha comparti nan sentimentonan como partner y despues casa.

Nan a topa otro oficialmente na trabou di Endy na aeropuerto. Carl mester a haci su stage pa Universidad na aeropuerto y e mester a acerca Endy como PR di aeropuerto pa informacion adicional cu e tabatin mester pa su tesis. Aki ta unda cu tur cos a cuminsa.

Ki ora a ripara e spark? 

Pa Endy e spark tabat’ey di biaha. “Carl ta un persona calmo, respetuoso y cu hopi confiansa den su mes,” Endy a bisa Bon Dia Aruba. Tur esaki Endy por a ripara di biaha ora a papia cu Carl. Pa Carl, e proceso a dura un tiki mas. “Endy no tabata mi ‘tipo,’ pero door di combersa y cera conoci mas cu Endy, e ora un spark a cende y fuerte!”

Cua tabata e prome date y con el a bay? 

E prome date di Endy y Carl tabata pa come sushi. Un date cu a dura hopi mas largo cu a spera, pasobra por a combersa riba asina hopi topico y di forma hopi habri. Desde e prome date a haya sa caba kico tur dos tabata busca den un pareha y ya a forma un base pa futuro. “E ta hopi importante pa bo ta open y honesto cu un persona cu bo ta conociendo y esey ta loke a sosode tambe,” Endy a conta.

Con pa boso el a bisa cla cu ‘yip, this is my partner, my big love.’

E ta e sentimento cu tanto Endy y Carl a haya cu tur cos ta cana di un forma natural y sin forsa. Endy y Carl a sinti cu nan a topa cu un persona cu ta acepta nan manera cu nan ta y no kier cambia otro, sino celebra y apoya otro. “Vooral e parti unda cu nos tur dos a sinti cu no tin un apoyo incondicional for di otro, ta loke a duna e sentimento cu a haya e persona cu bo lo kier comparti full bo bida hunto cune.”

 

Boso a tuma e paso pa casa, e tabata algo organico?  

Di e manera cu e relacion tabata cana, casamento tabata mustra e siguiente paso logico pa como pareha sigui desaroya y crece hunto. P’esey na momento cu Carl a sorprende Endy cu su proposicion pa casa, Endy no a duda mes pa bisa “si. Porta en berdad casamento ta djis un papel, pero e ta representa tambe cu di forma oficial ta scoge pa comparti bida cu otro.”

Cua tabata e retonan pa boso como pareha di e mesun sexo y con boso a surpasa nan? 

Como pareha di mesun sexo, e retonan diario ta mesun cos cu cualkier otro pareha, pero como pareha di mesun sexo cu kier casa, aki si tin mas reto ta bin cune. Un pareha di mesun sexo no por casa na Aruba “unda cu nos ta biba, dus pa por casa mester a scoge pa haci esaki na Bonaire, Hulanda of Merca.” Mirando cu Endy y Carl tin lasonan cu Bonaire, a scoge pa Bonaire. Dus e gastonan pa e matrimonio unda cu kier a celebra cu famia y amistadnan tabata halto. “Pero e matrimonio y celebracion na Bonaire tabata asina bunita cu a pone tur esaki un banda pa djis celebra bida cu otro y cu tur esnan cu a asisti na e bruid.” Tin mas reto legal, pero como pareha Endy y Carl ta scoge pa enfoca riba tur loke ta bon y bunita den bida na lugar di enfoca riba e retonan.

 

Con un dia liber na cas Croes-Quant ta mustra?

“Un dia liber na cas ta un dia hopi rustig.” Endy y Carl ta gusta cushina hunto, mira pelicula hunto y tambe plania hunto pa futuro. “Tur esakinan ta wordo acompaña si pa un glas di prosecco bon friu! E ta hopi comun tambe pa amistadnan t’ey presente na cas pa sea hunga wega hunto of pa simplemente combersa y pasa tempo cu otro. Na cas di Endy y Carl tur hende ta bonbini pa pasa un rato gezellig.”

 

Y awor cu e paso pa bay Hulanda, what’s next?

Carl mientrastanto a kita di FPNA y a cuminza traha na Hulanda caba. Pa Augustus Endy tambe lo muda. Tanto Endy y Carl ta encanta biaha y conoce paisnan nobo. “Nos kier siña, conoce y experencia tur loke cu bida tin pa ofrece y for di Hulanda e posibilidadnan ta endless. What’s next? Awor nos ta en busca di un hogar na Hulanda cu nos por personalisa. Mas den futuro e plan ta pa sigui muda na otro paisnan den Europa y Asia.”

Endy y Carl pues, despues di a conkista otro ta cla pa conkista mundo.