For di dies aña pasa e ta fungi como instructor di yoga, algun tempo pasa el a funda y a organisa Cadushi Festival, tambe a traha como periodista y a dirigi un fundacion. Awor e mes ta sigura cu tin e mision di biba su proposito den un biahe di descubrimento y crecemento pa bida, naturalesa, musica, arte, cultura, amor, entre otro.
Su nomber ta Carina Wever. El a conta Bon Dia Aruba cu el a biba na Hulanda pa varios aña y a bin Aruba back na 2008. For di e tempo ey, el a involucra su mes den diferente actividad como Cirkel, un luga unda hende tabata bay pa haci diferente tayer, les di yoga, reunion pa duna apoyo na otro hende – e mes a sigura cu e idea aki tabata un excuus pa hende bin hunto y sinta pa papia di cualkier cos.
Den un entrevista special pa Bon Dia Aruba, Wever a sigura cu ademas e ta yuda hende muhe na estado, loke a conduci pa e haci un training na New York, Merca, pa e bira “doula,” un coach cu ta para banda di hende muhe ora e ta haya yiu, pa yud’e den e parto y tur e proceso ey cu e baby. E palabra Doula mes ta di origen Griego.
Pero ‘Wellness’ ta un palabra den cual e tabata interesa for di chikito, manera e ta conta. E ta haci yoga for di tempo cu e tabatin 11 aña y movecion cu cosnan saludabel semper tabata hala su atencion. “Esey tabata un trayectorio cu tabata natural pa mi.”
E tabata organisa Cadushi Festival y a traha cu otro fundacion cu tabata organisa eventonan pa sector financiero. Pero awor, el a yega na e punto cu e ta purba combina tur e cosnan cu otro den loke e ta haci: yoga y eventonan uniendo diferente elementonan di wellness como movecion, halamento di rosea, meditacion, hasta nutricion y otro habitonan saludabel, “Cu ta yuda bo na yega na e picture completo, pasobra pa bo ta full saludabel no ta un caminda so bo ta djis como saludabel y that’s it. Mi ta purba combina tur e diferente elementonan cu den mi mesun experiencia di bida, a resulta pa mi cu ta efectivo,” el a declara.
Awor e tin un compania cu ta busca tur diferente manera pa por yuda e hende yega na Holistic Wellness, unda tin tur e diferente elemento pa yega na un salud optimal, manera el a sigura. “Mi ta purba di busca colaboracion pasobra mi ta pensa cu tin hopi hende cu ta haci diferente manera di yuda hende, pa yega na un punto mas saludabel. Hasta salud mental ta conta den esey, por ehemplo cu psicologonan of coach, nutricionista, trahado social cu ta purba di yuda hende pa nan sinti miho.”
Asina el a cay den e proyecto Women’s Month Uniting Women conhuntamente cu otro hende muhe empodera y profesionalnan, cu pa luna di maart ultimo a organisa diferente actividad pa conmemora Dia Internacional di Hende Muhe. “Tur di nan tin nan mesun experticio y ta yuda hende muhe cu e mesun meta, yuda nan pa bira mas saludabel, mas fuerte y asina ey mi a uni nan den e proyecto,” el a bisa.
Di esaki, el a sigura cu el a bay bon, “y e parti mas importante ta cu nos a ripara hopi reaccion y hopi entusiasmo. Hendenan a bisa pa nos haci esaki mas biaha y no solamente pa luna di hende muhe. Nos tur tin un otro approach como un di nan ta psicologo financiero, e ta yuda hende pa figure out kico ta nan patronchinan cu placa y pakico bo tin un bon of mal relacion cu placa; otro di nos ta tremendo den coaching, e ta papia cu hende, motiva nan; otro a duna les di arte pa yuda hende yega na un punto mas positivo den nan bida,; otro mucha muhe a duna kickboxing pa mas empoderamento, entre otronan cu tambe tabata den esaki.”
El a trece dilanti cu su persona hunto cu e grupo aki kier haci un follow-up pa evalua con e actividadnan aki a bay y pa wak den ki forma nan por laga e colaboracion ey sigui biba, pa e no bira algo cu ta haci un biaha pa aña. “Nos kier purba pensa na un manera cu nos por sigui uni forsa, pa sigui ofrece algo na hende pa e resto di aña. Esaki no ta concreto ainda pero esey ta e plan.”
Pero esey no ta enfoca solamente riba hende muhe sino tambe riba hende homber cu den e tempo cu e actividadnan a tuma luga, tambe a puntra si esey tabata disponibel pa hende homber. Wever a enfatisa cu tur hende tin mester di e mesun conocemento pa por bay dilanti. “Pa nos por yega na un estado di funciona optimal den bida, mi ta sinti cu e ta great pa nos tin un Womens Day. Pero tambe esey tin cu duna importancia pa hende homber pa tur haci algo hunto, ya cu nan no tin e mesun pasion of actividadnan pa nan dia,” el a expresa.
E ta desea pa tin mas colaboracion entre personanan similar cu ta ofrece servicionan asina, pa tur hende por beneficia di dje. “E ta cuminsa na chikito cu nan ta cuminsa siña cu mucha homber mester ta fuerte, mucha homber no ta yora. Nan tambe tin nan sentimento pero nan ta lock esey den un cashi y e ora nan ta purba di ta fuerte, cu eigenlijk no mester un tiki di ayudo of sosten.”
Pa finalisa, Wever ta kere cu futuro di humanidad ta depende hopi mas di colaboracion. “Tin asina tanto hende haciendo cosnan great pa contribui den un manera positivo, pero hopi biaha nos tin e tendencia di traha den un isla chikito, mi ta haci parti y cla. Mi ta kere cu pa futuro nos por echt yuda e hendenan cu mester di dje, esey ta importante pa nos busca manera pa uni forsa. Tur ser humano tin e derecho di sinti nan mes mas tremendo posibel den tur sentido, tanto fisico como mental y emocional.”
