Mientras cu horcan Humberto ainda ta moviendo dilanti costa Mericano, e siguiente posibel horcan a presenta. Tormenta tropical Jerry a forma tempran ayera y ta sigui gana forsa cu e expectativa di bira horcan diahuebs anochi of diabierna mainta, mientras e sistema ta move den direccion west, segun National Hurricane Center (NHC) di Merca su update di 11:00 am ayera.
Jerry tin biento sosteni maximo di 50 miya pa ora y a aumenta su velocidad di movecion pa 14 miya pa ora (22,4 km pa ora), segun NHC. Lo considera e sistema un horcan categoria 1 ora e bientonan yega na 74 miya pa ora (86,4 km pa ora).
E tormenta tropical ta riba un rumbo west-nortwest den direccion di Leeward Islands y ta anticipa cu e lo yega ey diahuebs anochi como un horcan. Segun NHC, Jerry ta pasa panort di Puerto Rico riba diasabra.
Proyeccionnan riba computer ta indica cu e tormenta por salta Caribe influencia pa horcan di categoria 3 Humberto cu ta bayendo den direccion nort y ta spera cu e ta ranca Jerry den su direccion. Sin embargo, a bandanan pafo di Jerry por trece hopi yobida y biento pa teritorionan manera Puerto Rico. E bientonan cu forsa di tormenta di Jerry ta extende te cu 45 miya for di su centro.
