E islanan den region di Caribe ta na alerta pa e tormenta tropical yama Gonzalo. Centro Nacional di Horcan di Estadonan Uni (NHC) a bisa den un update di diaranson 22 di juli cu e depresion tropical number siete a desaroya te na nivel di tormenta tropical Gonzalo riba Atlantico.
Esaki ta establece un record pa e tormenta tropical number siete mas tempran den temporada di horcan di Atlantico. NHC a bisa cu e depresion tabata ubica diarazon mainta na alrededor di 1.250 miya (2.010 kilometro) na banda oriental di e Islanan di Sotavento, cu biento maximo di 45 miya pa ora (75 km pa ora), moviendo den direccion west-noordwest na 12 miya pa ora (19 km pa ora).
Gonzalo ta keda aleha di cualkier isla ainda, riba un ruta cu por eventualmente hiba e tormenta den fin di siman venidero den e parti sur di Caribe (den un posible trayecto cu ta inclui islanan ABC; red.). Segun Servicio Meteorologico di Trinidad & Tobago Gonzalo mester pasa parti panort di e islanan riba diasabra mainta.
Segun calculacionnan di e modelo, biento di tormenta por probablemente afecta Barbados, St Lucia, y St Vincent & Grenadines, sin embargo e sistema por tuma otro rumbo. Ta urgi e islanan di Caribe pa monitor nan entidadnan local di meteorologia pa e ultimo updatenan.
E desaroyo di forza asina tempran di Gonzalo ta kibra un record estableci pa tormenta tropical Gert, forma dia 24 di juli 2005. Pa loke ta e aña aki, Cristobal, Danielle, Edouard y Fay tur a establece record pa ta e promer tormentanan cu nomber segun nan lugar den alfabet.
