Caribe: Reino Uni ta obliga Caribe Britanico mantene registro di ‘beneficial owner’

E teritorionan di ultramar Britanico (British Overseas Territories;BOT) lo ser obliga di haci e datonan di beneficial owner ( e accionista final y berdadero) di e companianan registra den nan teritorio, di conocemento publico.

Esaki despues cu un amienda apoya pa tur partido di un ley contra labamento di placa a keda acepta pa gobierno di Reino Uni.

Den un golpi significante na e sectornan financiero di e teritorionan liga na Reino Uni den Caribe, nan lo mester desaroya registro publicamente accesibel pa fin di 2020. Mientras cu ministro di asunto exterior Sir Alan Duncan a bisa cu e lo a prefera yega na un consenso na luga di forsa e teritorionan pa actua, gobierno di Reino Uni a scucha miembronan di su parlamento.

Sin embargo, e decision di obliga e teritorionan di ultramar cu e registronan mester ta publico, no ta aplica den e caso di e dependencianan di Corona, cual ta e islanan Guernsey, Jersey y Isle of Man. Esaki lo bira un asunto importante pa lidernan politico di e teritorionan concerni, y di representante di e sectornan financiero, ilustrando e hipocresia y trato desigual cu nan ta experimenta continuamente.

Durante e debate di diamars pasa, Duncan a bisa cu Partido Conservador di Reino Uni a spera di por yega na un compromiso riba e asunto, pero e cantidad di miembro di parlamento cu tabata apoya e deseo di mas transparencia den loke nan ta mira ainda como tax havens lo a hiba na un derota di henter e ley. Apoyo pa e amienda pa forsa man di e teritorionan BOT cu sector financiero, a bin di tanto di banda gubernamental como di oposicion.

Duncan a admiti cu traha ley pa e BOTnan sin consenso ta priva nan representantenan electo di nan derecho, y por ‘tin riesgo di haci daño na nos areglonan constitucional di antaño, cu ta respeta nan autonomia.” Pero mustrando riba e forsa di e sentimentonan den parlamento Britanico, e ministro a bisa cu gobierno Britanico a acepta “loke tabata sin duda e vision mayoritario di e Cas, cu e teritorionan di ultramar mester tin registro di acceso publico, anticipando cu e ta birando un standard internacional.”

(fuente: CaribbeanNewsNow)