Royal Bank of Canada (RBC) a anuncia diahuebs e noticia cu nan ta bende nan operacion completo den parti oriental di Caribe cu un grupo di banco local, haciendo nan e banco Canades mas reciente cu ta para nan operacion den e region.
E banco no a divulga e terminonan financiero di e deal, pero a bisa cu e benta ta inclui e sucursalnan di RBC na Antigua, Dominica, Montserrat, St. Lucia y St. Kitts & Nevis. Ta anticipa di finalisa e deal den e proximo lunanan y esaki lo ta suheto na aprobacion di autoridadnan regulador. E grupo di banco local ta consisti di 1st National Bank di St. Lucia, Antigua Commercial Bank Ltd, National Bank of Dominica Ltd, Bank of Montserrat y Bank of Nevis Ltd.
Varios banco Canades tin un historia bastante largo di haci negoshi den Caribe, pero ultimamente varios a retira buscando negoshi di mayor escala y enfoke. Un di nan ta Canadian Imperial Bank of Commerce (CIBC) cu a anuncia un luna pasa cu nan ta prepara pa bende un participacion significante di nan operacion den Caribe. CIBC a cuminsa na 1920 den Caribe como Canadian Bank of Commerce. CIBC a anuncia cu nan a yega na un acuerdo pa bende 66,73% di CIBC FirstCaribbean cu GNB Financial Group Ltd. pa US$797 miyon.
Parti di e deal, US$ 200 miyon lo paga cash y e restante den financiamento sigura pa CIBC mes. Ta anticipa cu e acuerd lo keda formalisa na 2020, pendiente aprobacion. Despues CIBC lo mantene un participacion di 24,9% den FirstCaribbean.
Na september pasa Bank of Nova Scotia a anuncia cu nan tabata den fase final di cera acuerdo pa bende parti di nan operacion den Caribe tambe. E cambionan aki ta probablemente relaciona cu e aumento di e reservanan cu banconan Canades mester mantene segun autoridad regulador di Canada, pa motibo di nivel halto di riesgo cu debe, tanto pa hogar como corporativo. E banconan comercial ta trata di deshaci di nan operacionnan menos rentable.
