Hotelnan den Caribe a continua cu duna descuento como manera pa purba mantene grado di ocupacion halto, segun Caribbean Journal.
Esaki mientras cu yegada di bishitante en general si a keda subi durante 2019 y Caribbean Tourism Organisation (CTO) su division di investigacion ta predeci un aumento di entre ocho y nuebe porciento den yegada di turista pa e aña completo.
E site Hospitality.net ta calcula cu pa e proximo tres pa cinco aña tin mas di 100 proyecto di en total aproximadamente 27.300 camber den pipeline actualmente.
E aumento aki di oferta hunto cu cifranan rapidamente aumentando di yegada di bishitante y bon prestacion di hotelnan existente durante ultimo trimester di 2018 y prome mita di 2019 ta indica un 2019 hopi bon.
Sin embargo, Caribbean Journal ta indica cu cifra di ocupacion di hotel y di ‘average daily rates’ (ADR) a continua nan bahada durante 2019 na november ultimo, di acuerdo cu e ultimo informe di e firma di analisis STR.
Ocupacion di hotel den e region tabata na 63.4% na november pasa, un reduccion di 2.1% compara cu e mesun luna di 2018. ADR pa e periodo tabata $177,84, un reduccion di 1,9% compara cu november 2018.
November tabata de hecho e di ocho luna consecutivo di bahada den ocupacion di Caribe. Pa 2019, te cu november, ocupacion di hotel den Caribe ta na 63,7%, un caida di 2,9% compara cu e prome 11 luna di 2018. Registracion ‘year to date’ sin embargo ta duna un incremento di 6,1% pa ADR, te na $132,12, un salto positivo di 3% compara cu e aña anterior. E informe di STR a analisa 1.973 hotel cu en total 258.151 camber den region di Caribe.
