Siman pasa diamars, ocho pais di Caribe, miembro di e Organisacion di Estadonan Americano (OEA), cu ta Antigua-Barbuda, Barbados, Belize, Dominica, St Kitts-Nevis, St Vincent &Grenadines, Suriname, y Trinidad-Tobago, acompaña dos dia despues pa Grenada, a entrega un nota formal na presidente di e Conseho Permanente di OEA, relaciona cu e accionnan cu nan ta considera ‘ultra vires’ (traspasando limite di poder o autoridad; red.) pa loke ta regla y procedimento di Conseho Permanente di OEA, e Carta Magna di OEA y legislacion internacional.
E violacion señala ta e aceptacion di nombramento di Gustavo Tarre Briceño como representante oficial y permanente den e conseho di republica Venezuela, pendiente eleccion nobo y e nombramento di un gobierno elegi democraticamente.
E paisnan Caribense ta apoya e posicion di Mexico encuanto “e inconsistencia cu ley internacional y e normanan di e Organisacion inherente na e resolucion encuanto e situacion na Venezuela.”
E miembronan ta referi tambe na e aceptacion dia 10 di april 2019 p e secretario general di OEA di e credencialnan di Tarre Briceño, como e representante designa permanente di e Asamblea Nacional di Venezuela.
Sin embargo, segun e paisnan den protesta, articulo 80 di e constitucion di OEA ta bisa: “ E Conseho Permanente di e Organisacion ta consisti di un representante di cada estado miembro, specialmente nombra pa e respectivo gobierno cu e rango di embahador. Cada gobierno por acredita un representante interino como tambe reemplazante o asesor cu e ta considera necesario.”
Segun e 9 paisnan, e carta di designacion di Tarre Briceño ademas tabata fecha dia 22 di januari 2019, un dia prome cu Guaido a proclama su mes presidente interino di su pais, ademas cu designacion tabata como representante special, no representante permanente.
