Caribe: Miyones di habitante den zonanan cerca di lama ta core riesgo

(CaribbeanNewsNow) – Miyones di hende den Caribe cu ta biba den e areanan mas abao cerca di lama, ta core riesgo cu aumento di nivel di lama lo tin un impacto mas grandi y lo ta mas dificil pa para cu loke tabata kere te awor, a pesar di reduccion den emision di CO₂,   asina cientificonan ta bisa den un estudio nobo.

Aumento di nivel di lama ta un consecuencia mayor di cambio di clima y por observa e efectonan caba den varios area rond mundo, pero cientificonan ta adverti cu e por ta hopi mas severo a largo plaso, hasta si mundo adheri na e metanan di e acuerdo di Paris.

Un estudio nobo publica den Nature Communications dialuna pasa ta revela cu aumento di nivel di lama lo no responde rapidamente riba reduccion di gas dañino pa motibo di e combinacion di factor cu ta forsa e nivel di lama bay mas halto.

E expansion termico di awa di ocean, e reduccion di glaciar di montaña y capa di ijs, y mas  perdida di e capanan di ijs di region Arctico y Antarctica ta impulsa e aumento ey.

Cientificonan a haya sa cu e factornan contribuyente aki ta responde na forma diferente na un clima mas cayente, y tur ta responde na schema di tempo cu ta varia di siglo te na milenio. Cu e nivelnan actual y den futuro inmediato di emision, mundo ta enfrentando un legado di aumento di nivel di lama, cu lo no haci nada otro cu sigui aumenta den e proximo siglonan.

E investigadonan a bisa cu cada retraso di cinco aña den sikiera para aumento di  emision di CO₂ lo probablemente aumenta nivel di lama, calcula pa 2030 na 20 centimeter.

“Cambio di clima causa pa humano a pre-programa caba un cierto cantidad di aumento di nivel di lama pa e proximo siglonan, pues pa cierto hende por parce cu nos actual accionnan lo no haci tanto diferencia, pero nos estudio ta mustra con kiboca e percepcion aki ta”,  autor Matthias Mengel di potsdam institute for Climate Impact Research (PIK), a bisa den un reuda di prensa.

“Cada retraso den para aumento di emision pa cinco aña entre 2020 y 2035 por significa un adicional 20cm di aumento di nivel di lama finalmente, cu ta e mesun cantidad cu e costanan di mundo a experimenta desde comienso di e era pre-industrial.”

E cientificonan ta adverti cu tin consecuencia di retraso den tuma accion y cu mitigacion diligente di clima ta crucial pa limita riesgo adicional.