(CaribbeanNewsNow) – Washington – Un firma cu ta hunga un papel importante den promove programa di duna ciudadania na inversionista di exterior como incentivo, e asina yama programa di ‘Citizenship by Investment’ (CBI) cu entre otro Grenada y St Lucia ta implementando, a haya problema cu husticia Mericano.
Ta acusa e empresa di a facilita un paspoort di St Kitts & Nevis, cu tambe tin un programa similar, na un persona di Iran, cu a keda aresta na Merca pa evadi sancion economico di Merca contra Iran.
Henley & Partners aparentemente a percura pa dos paspoort di St Kitts and Nevis pa Ali Sadr Hashemi Nejad, presidente di Pilatus Bank estableci na Malta, cu a keda aresta dia 19 di maart 2018 pa su supuesto envolvimento den un plan pa evadi sancion economico di Merca contra Iran, pa defrauda Merca, y pa comete labamento di placa y fraude bancario.
Sadr a haya un acusacion di seis diferente delito pa participa den un plan cu mas di US$ 115 miyon envolvi, den pago pa un compleho di vivienda na Venezuela, placa cu a ser canalisa ilegalmente via e sistema financiero Mericano pa beneficio di persona y entidadnan Irani.
En conexion cu su papel den e plan, Sadr a tuma paso pa evadi sancion economico Mericano, scondiendo e papel di Iran y participante Irani den pago den dollar Mericano. Por ehemplo, na 2010 Sadr y un otro persona a uza paspoort di St Kitts y Nevis y un adres na Emiratonan Arabe Uni pa constitui dos entidad pafo di Iran cu por a ricibi pago na dollar Mericano.
Sadr y Pilatus Bank a cuminsa caso pa difamacion contra e fayecido periodista Daphne Caruana Galizia, despues cu Caruana Galizia a publica cu e banco a procesa un transaccion di US$1 miyon di un compania na Dubai pa e esposa di e prome ministro di Malta, Joseph Muscat, riba encargo di e yiu muhe di presidente di Azerbajan, Ilham Aliyev. E banco a nenga e acusacion.
Despues, Caruana Galizia a ser mata den un explosion di su auto na october 2017 y Henley & Partners a ser acusa di a conspira pa asesina e periodista di Malta.
