Den region di Caribe e discusion tocante seguridad di alimento ta creciendo. Tur teritorio a haya golpi fuerte den e crisis economico causa pa e crisis di coronavirus. Loke ta hiba tambe na duda encuanto e capacidad pa importa cuminda.

Professor Wayne Ganpat, Decano di e Facultad di Alimento y Agricultura di University of the West Indies (UWI), St Augustine, ta bisa cu e pandemia di COVID-19 a expone e vulnerabilidad di e region pa mantene seguridad alimentario.

“Caribe no ta inmuno pa efectonan mundial. Mester djis recorda e crisis mundial di alimento na 2008 y e problemanan pa logra nos importacion di cuminda. E actual pandemia di coronavirus a expone e vulnarabilidad total di e region. Nos no tin ni seguridad alimentario ni soberania den alimentacion.”

“Nos preocupacion actual y apropia cu e virus a pusha nos pa pensa tambe cu nos ta parti di un desaoyo global y cu nos mester responde como region.”

Ganpat ta bisa cu e dependencia di e paisnan riba importacion di alimento ta bin di problemanan socio-cultural. “Globalisacion y liber comercio ta permiti nos importa cuminda facilmente incluyendo producto yena cu preservativo, halto den contenido di sucu y vet y den cierto caso, cuminda na bleki cu fecha di vencimento hopi cerca y den cierto caso hasta cu a vence caba. Nos ta inclina den direccion di producto di exterior, talvez pa via di mercadeo y tambe pa e pensamento cu ‘di exterior’ ta significa mihor cu local.”

Ganpat a bisa cu un plan di alimento y nutricion ta necesario pa atende e asunto urgente aki, specialmente cu prijsnan di energia fluctuando fuerte asina.

“Pa Trinidad & Tobago e factura di importacion ey ta soportable pasobra e pais ta beneficia di entrada di gas y petroleo. E otronan den e region ta depende di turismo pa nan divisa. E enfoque regional riba divisa di e sector aki a causa cu nos a ignora agricultura como prioridad. Cu entrada di e sectornan cayendo, nos hendenan keto bay mester come.” Ganpat ta bisa cu accion urgente ta necesario.

E ta mira dos tipo di accion: Produccion local reorganisa na empresanan agricola den henter region, y “den cada hogar un jardin”.